“ტელევიზორის მოწმე” – ხოშტარიას პროცესზე უცნაური მოწმე წარსდგა

დღევანდელ პროცესზე შინაგან საქმეთა სამინისტროს მოწმეები დაიკითხნენ, მათ შორის ერთ-ერთი მოწმე სასამართლო დარბაზში ამტკიცებდა, რომ როდესაც ელენე ხოშტარიამ კახა კალაძის ბანერს “რუსული ოცნება” მიაწერა, ის მომხდარს სახლიდან, ტელევიზორში ადევნებდა თვალს, რის შემდეგაც ოქმის შედგენა გადაწყვიტა. დიახ, იჯდა თავისთვის სახლში, ჩართო ტელევიზორი, უყურა და გადაწყვიტა, რომ უნდა იყოს მოწმე. შემდგომში შეიძლება იყოს სოციალური ქსელის მოწმე – მაგალითად, ვსქროლავდი ჩემთვის და ვხედავ… – უკაცრავად, ასეთი მოწმეები უკვე იყვნენ, თან არაერთ პროცესზე.

ელენე ხოშტარიას ადვოკატი ამბობს, რომ დაცვის მხარე მტკიცებულებების გამოკვლევაშიც კი არ მონაწილეობს, რადგან ასეთია ხოშტარიას სურვილი. შესაბამისად, პროკურატურა, პრაქტიკულად, ცალმხრივად მონაწილეობს პროცესში. რამდენად ობიექტური იქნება ამ პირობებში საერთოდ ნებისმიერი გადაწყვეტილების გამოტანა – ამაზე, იმედია, იურისტები იმსჯელებენ ოდესმე მაინც.

შეგახსენებთ, რომ თბილისის საქალაქო სასამართლომ თავდაპირველად კახა კალაძის საარჩევნო ბანერის დაზიანებისთვის ბრალდებულ პოლიტიკოსს, ელენე ხოშტარიას აღმკვეთი ღონისძიების სახით 5 000 ლარის ოდენობით საპატიმრო გირაო შეუფარდა,  თუმცა ელენე ხოშტარიამ გირაოს გადახდაზე უარი განაცხადა, რის შემდეგაც მაც აღკვეთის ღონისძიების სახით პატიმრობა შეეფარდა.

ელენე ხოშტარიას ბრალდება საქართველოს სისხლის სამართლის კოდექსის 187-ე მუხლის პირველი ნაწილით (სხვისი ნივთის დაზიანება, რამაც მნიშვნელოვანი ზიანი გამოიწვია) წარედგინა, რაც სასჯელის სახედ და ზომად ერთიდან ხუთ წლამდე თავისუფლების აღკვეთას ითვალისწინებს.