“მანქანასთან მიაყენა და სცემა მანამ, სანამ ბავშვს არ აღებინა” – სოფლის გამგებელს 15 წლის მოზარდის ძალადობაში ადანაშაულებენ –

სოფლის გამგებელს 15 წლის მოზარდი ძალადობაში ადანაშაულებს.  ტვ პირველის ცნობით, სკოლის მოსწავლე ამტკიცებს, რომ საჯარო მოხელემ, ოგანნეს გაბრიელიანმა, რომელიც ახალქალაქის ერთ-ერთი სოფლის წარმომადგენელია, ის სცემა  და ჯგუფურ ანგარიშსწორებაში  სხვა ხუთ პირთან  ერთად იღებდა მონაწილეობას.

დაშავებულის ოჯახის წევრები ამტკიცებენ, რომ მოზარდებს შორის დაწყებული დაპირისპირების შემდეგ, ოგანნეს გაბრიელიანი სკოლის მოსწავლეს აედევნა და ფიზიკურად იძალადა.

“5 ადამიანთან ერთად იმყოფებოდა, სამი მათგანი 50 წელს გადაცილებული იყო. მოვიდნენ თავიანთი ფორდის მანქანით, ვინც შეხვდათ გზად ყველას სცემდნენ. ეს ფაქტი ბავშვმა, რომ დაინახა როგორ ურტყამდნენ ხალხს, გაიქცა… გზაში დაიჭირა სოფლის გამგებელმა, მანქანასთან მიაყენა და სცემა მანამ, სანამ ბავშვს არ აღებინა… იხრჩობოდა ბავშვი. მოტეხილობები არ ჰქონია, მაგრამ დალურჯებები ჰქონდა, ნეკნები და თავი სტკიოდა. ექვსივე ოჯახის წევრია და ეს პირველი შემთხვევა არ არის, როცა ისინი ხალხს ესხმიან თავს და სცემენ. ეს უკვე მეშვიდე შემთხვევაა” – ამბობს მოზარდის ოჯახის წევრი TV პირველთან. 

ოგანნეს გაბრიელიანი ძალადობას კატეგორიულად გამორიცხავს. ამტკიცებს, რომ ინციდენტში მონაწილეობა საერთოდ არ მიუღია, თუმცა, ამბობს, რომ ფაქტზე პოლიციამ გამოკითხა.

არ ვიცი რაზე მესაუბრებით, მე არანაირ თავდასხმაში მონაწილეობა არ მიმიღია, რაზეც მესაუბრებით ჭორია. გიდასტურებთ, რომ პოლიცია ნამდვილად იყო ჩემთან და გამომკითხეს, თუმცა არ ვიცი რა შუაში ვარ ამ დაპირისპირებასთან” – თქვა სოფლის გამგებელმა.