“წინა ხაზზე ვიქნები”- სააკაშვილის ამ განცხადების გამო, ელჩს ხელმეორედ იბარებენ თბილისში

საქართველოს ელჩს უკრაინაში საგარეო უწყება ხელმეორედ იბარებს.  ამის შესახებ პირველმა დიპლომატმა, დავით ზალკალიანმა მთავრობის ადმინისტრაციაში გამართულ საგანგებო ბრიფინგზე განაცხადა.

„სწორედ ეს არის ზუსტად ის საკითხი, რის გამოც ჩვენ გვქონდა ძალიან სერიოზული მიდგომა და რის გამოც, ჩვენ ელჩი გამოვიწვიეთ კონსულტაციებზე. სწორედ ამის შესახებ ვაფრთხილებდით ჩვენს უკრაინელ კოლეგებს – ადამიანი, რომელიც ინიშნება ერთ-ერთ მაღალ თანამდებობაზე, რომელიც არის ძებნილი და, რომელსაც ქართული მართლმსაჯულება ოთხი დამოუკიდებელი ქეისის მიმართლებით სთხოვს პასუხს, გააგრძელებდა საქართველოს შიდა პოლიტიკაში ჩარევას.

სწორედ იქიდან გამომდინარე, რომ ჩვენი სტრატეგიული პარტნიორობა არ ითვალისწინებს ამას, ეს იყო გაფრთხილება და ჩვენი წუხილი იმასთან დაკავშირებით, რა მოქმედებაც მივიღეთ და რის გამოც ჩვენ ელჩი გამოვიწვიეთ.

ბუნებრივია, ის განცხადება, რომელიც გუშინ მოვისმინეთ, არის პირდაპირი ჩარევა სხვა ქვეყნის საშინაო საქმეებში და პირდაპირ საარჩევნო პროცესში უკრაინის მოქალაქის, რომელიც ამჟამად ერთ-ერთ მაღალ თანამამდებობაზეა“,- განაცხადა ზალკალიანმა და დასძინა, რომ საგარეო საქმეთა სამინისტროში ელჩს განმარტებებისთვის დაიბარებენ.

„შეგვიძლია, სიტყვა-სიტყვით გავშიფროთ მისი თითოეული გამონათქვამი. მე მაინტერსებს ჩვენი უკრაინელი კოლეგებისგან და ამის შესახებ გვექნება საუბარი. რა თქმა უნდა, დავიბარებთ ელჩს საგარეო საქმეთა სამინისტროში და მოვთხოვთ განმარტებებს, რადგანაც ეს არის აშკარა, პირდაპირი ჩარევა უცხო ქვეყნის მაღალჩინოსის სხვა ქვეყნის და არა უბრალოდ სხვა ქვეყნის, არამედ სტრატეგიული პარტნიორის საშინაო საქმეებში და საარჩევნო პროცესში. ამასთან დაკავშირებით ჩვენ მოვისმენთ საქართველოში უკრაინის ელჩის განმარტებებს“