“დაწინაურება დავიმსახურე, ხელის ანაბეჭდია იარაღზე ხან რჩება და ხან არა” – რურუას დამკავებელი დააწინაურეს

უკავშირდება თუ არა თბილისის პოლიციის დეპარტამენტის უფროსის მოადგილის კახა მურადაშვილის დაწინაურება “მთავარი არხის” ერთ-ერთი მეწილის, გიორგი რურუას დაკავებას. საკითხზე კომენტარი დღეს მურადაშვილმა სასამართლოს შენობასთან გააკეთა.

კახა მურადაშვილი იმ საგამოძიებო სამმართველოს უფროსი იყო, რომელმაც გიორგი რურუას დაკავება მოახდინა.

“ჩემი დაწინაურება ხელმძღვანელობამ გადაწყვიტა და ამაზე პასუხს მე ვერ გაგცემთ, ეს რურუას დაკავებასთან არანაირ კავშირში არაა. არაერთ მნიშვნელოვან საქმეში მაქვს მონაწილეობა მიღებული, ბევრი გაუხსნელი საქმე გაიხსნა ჩემი ხელმძღვანელობისას. შესაძლოა, ჩემმა ხელმძღვანელობამ ჩათვალა, რომ მე დაწინაურება დავიმსახურე. ჩემი დაწინაურება რურუას საქმესთან არანაირ კავშირში არაა.”

რაც შეეხება ცეცხლსასროლ იარაღზე რურუას ბიოლოგიური მასალა ხელოვნურად გადაიტანის საკითხს, მურადაშვილმა ეს ფაქტი უარყო.

“ეს დაცვის პოზიციაა, მე პირადად ამას სიცრუეს და სისულელეს ვუწოდებ, რადგან იარაღიდან, რომელიც რურუას ჩხრეკის შედეგად იქნა ამოღებული, არსებობს ბიოლოგიური მასალა, რომელიც რურუასგან აღებულ ბიოლოგიურ ნიმუშს შედარდა, რაც იმას ნიშნავს, რომ იარაღზე არსებული კვალი რურუას ეკუთვნის. რაც შეხება იმას, რომ მასზე ხელის ანაბეჭდი და მეტალიზაცია არაა, ეს შესაძლოა, ზოგ ნივთზე დარჩეს და ზოგზე – არა, ეს არ არის იმპერატიული ხასიათის, რომ მასზე მაინც და მაინც უნდა არსებობდეს თითის ანაბეჭდი. რურუას მისი ჩხრეკის შედეგად ამოღებული იქნა ცეცხლსასროლი იარაღი და მასზე არსებული ბიოლოგიური მასალა ეკუთვნის რურუას. არანაირი კამერა გათიშული არ არის, ყველა კამერა იქნა ამოღებული, რაც კი იმ ადგილზე იყო და საქმეს ერთვის”