“პოლიციას უბრალოდ ხელიდან დაუსხლტა… პოლიციას არ ეწინააღმდეგებოდა” – პოლიციას თუ იმიტომ არ ემორჩილები, რომ ვინმე გინდა სცემო – ეს დაუმორჩილებლობა არაა! – გამოძიების უცნაური ვერსია

ვეტერანი სპორტსმენის ლუკა კურტანიძის საქმის პროკურორმა დავით კირჩხელმა სასამართლო პროცესის დასრულების შემდეგ განაცხადა, რომ მართალია ლუკა კურტანიძე პოლიციას, რომელიც მის შეკავებას ცდილობდა, ხელიდან დაუსხლტა, თუმცა, თურმე, ეს არ არის პოლიციისადმი დაუმორჩილებლობა, რადგან, მართალია, პოლიციას არ დაემორჩილა, მაგრამ, თურმე, “უშუალოდ პოლიციის მისამართით არ იყო ეს ქმედება”. გამოძიება ამბობს, რომ “უბრალოდ”, აი, “უბრალოდ”, დაზარალებულისკენ მიიწევდა საცემრად და ამ დროს უსხლტებოდა პოლიციას ხელიდან. სხვა რაა პოლიციის დაუმორჩილებლობა, მაშ? ან, სხვა რა არის პოლიციელზე თავდასხმა, როცა ცდილობს გაგაჩეროს და უსხლტები რომ ისევ თავს დაესხა ადამიანს? ლუკა კურტანიძის მოქნეული ხელით არც ერთ პოლიციელს არაფერი დაუწითლდა? და მხოლოდ მზია ამაღლობელის სილა აწითლებს პოლიციელთა ლოყებს? ან როგორ დაუსხლტა პოლიციას ხელიდან? აკავებდნენ პოლიციელები და არ დაემორჩილა და გაწია ისინი, ხომ? ხელი არ მოხვედრიათო და მხარი გამოიყენა და ისე გაწია? ფეხით? აბა, აწია და გადასვა პოლიციელი ნაზად? რას ნიშნავს, პოლიციას დაემორჩილა და მაინც გაიქცა ვინმეს საცემრად, პოლიციამ სთხოვა სცემე ქალიო და დაემორჩილა? – ამ კითხვებზე გამოძიებას პასუხი, ცხარია, არ გაუცია.

პროკურორის ერთობ უცნაურ განცხადებას ინტერპრესნიუსი ავრცელებს:

„სასამართლომ სრულად გაიზიარა ბრალდების მხარის შუამდგომლობაში მითითებული გარემოებები და შეუფარდა აღკვეთის ღონისძიების სახით პატიმრობა. ჩვენ მივუთითეთ შუამდგომლობაში, რომ არსებობდა როგორც მოწმეებზე ზემოქმედების საფრთხე, ასევე მიმალვის საფრთხე და ახალი დანაშაულის ჩადენის საფრთხე.

პოლიციელებს კურტანიძის ხელი არ ხვდებათ. ფაქტობრივად ბრალდებულის მხრიდან პოლიციელების მიმართ წინააღმდეგობა არ განხორციელებულა. უბრალოდ, როცა ის მიიწევდა დაზარალებულისკენ, ხდებოდა პოლიციელის მიერ ამის აღკვეთა. როგორც მოწმეები განმარტავენ, პოლიციას დაუსხლტა ხელიდან. უშუალოდ პოლიციის მისამართით არ იყო მიმართული ეს [ქმედება]. ჩატარდა გამოძიება, გამოკითხული იქნა როგორც პოლიციის თანამშრომლები, ასევე სხვა მოწმეებიც. ბრალდებულის ქმედება მიმართული იყო არა პოლიციელების წინააღმდეგ, არამედ დაზარალებულის მიმართ“

ცნობისთვის, „ქართული ოცნების“ ყოფილ დეპუტატს, ვეტერან მოჭიდავეს ლუკა კურტანიძეს აღკვეთის ღონისძიების სახით პატიმრობა შეეფარდა.

ლუკა კურტანიძეს პროკურატურამ ბრალდება ოჯახის წევრის მიმართ ძალადობის, ოჯახის წევრის ნივთის განზრახ დაზიანებისა და ოჯახის წევრის მიმართ დამცავი ორდერით გათვალისწინებული მოთხოვნების და ვალდებულებების შეუსრულებლობის მუხლით წარუდგინა, რაც 5 წლამდე ვადით თავისუფლების აღკვეთას ითვალისწინებს.