ფოტოკოლაჟი – ტვ პირველი
დღეს ოფიციალურად დადასტურდა ის, რასაც დაკავებულები, მათი ოჯახები და ადვოკატები, აქტივისტები, მოქალაქეები ამდენი თვეა ამტკიცებენ – კერძოდ ის, რომ ამდენი თვეა 11 პირი კი დაკავებული ჰყავთ ჯგუფურად დანაშაულის ჩადენის ბრალდებით, თუმცა, საქმეში არც ერთი მტკიცებულება ამ 11 პირს შორის პირდაპირი კავშირის არსებობის არ არის.
დღეს პროცესზე საქმის მთავარმა გამომძიებელმა, არსენ ხუნაშვილმა თქვა რომ „ბრალდებულების პირდაპირი კავშირი დანაშაულის ორგანიზატორებთან დადგენილი არ არის“.
მისი განმარტებით, ორგანიზება ბრალდებულების მობილური ტელეფონიდან უნდა დადგინდეს, რომელიც ექსპერტიზაზეა გაგზავნილი, გაგზავნამდე კი მობილური ტელეფონები თავად არ დაუთვალიერებია.
ტელეფონში შემავალი/გამავალი ზარების შესახებ არსენ ხუნაშვილს კითხვები დაუსვა სინდისის პატიმრის, გიორგი ტერიშვილის ადვოკატმა, ირაკლი ჩომახაშვილმა, რის საპასუხოდ მოწმემ დაადასტურა, რომ ტერიშვილის ტელეფონში შემავალი/გამავალი ზარების ამონაწერი ანძებიდან არ გამოუთხოვია.
მოწმეს შეკითხვა დაუსვა კიდევ ერთი ბრალდებულის, ვალერი თეთრაშვილის ადვოკატმა ირმა ჭკადუამ:
ირმა ჭკადუა: ვალერი თეთრაშვილმა ტელეფონი ხომ გადმოგცათ და კოდიც გაგიხსნათ. არ გაინტერესებდათ იქნებ ვინმე მას მოწოდებას უგზავნიდა დანაშაულის, რატომ არ გახსენით ტელეფონი? თქვით რომ შეიძლება ყოფილიყო მობილური ტელეფონები რაიმე ინფორმაციის მატარებელი 9 თვე რატომ არ დადგინდა ეს?
მოწმე: ამ კითხვას მეექვსეჯერ ვპასუხობ. გამომდინარე იქიდან რომ ამოარქივებული ინფორმაცია უფრო მნიშვნელოვანი იქნება ამიტომ არ მოხდა ტელეფონის გახსნა.
მოსამართლე ნინო გალუსტაშვილმა მოუწოდა მოწმეს, რომ იგივე კითხვაზე სხვა დაკავებულების კონტექსტშიც ეპასუხა.
„არის ვიდეოები, სადაც რამდენიმე პირი ერთად ჩანს. შესაძლოა, მათ ჰქონდეთ ერთმანეთთან კავშირი. ორგანიზატორთან პირდაპირი კავშირი არ ჩანს“, – განაცხადა არსენ ხუნაშვილმა.
საქალაქო სასამართლოში აქციაზე დაკავებული 11 პირის -ანდრო ჭიჭინაძის, ონისე ცხადაძის, ჯანო არჩაიას, რუსლან სივაკოვის, ლუკა ჯაბუას, გურამ მირცხულავას, ვალერი თეთრაშვილის, გიორგი ტერიშვილის, ირაკლი ქერაშვილის, რევაზ კინაძისა და სერგეი კუხარჩუკის პროცესი მიმდინარეობს.
- დაკავებულებს – ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კინაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.
- აღნიშნული დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.
კომენტარები