პოლიტოლოგი, დავით ზურაბიშვილი:
ტოტალიტარიზმის და ტირანიის ლოგიკიდან გამომდინარე, სრულიად გაუგებარია რატომ გრძელდება ამდენი ხანი პროტესტის მონაწილე პოლიტპატიმართა სასამართლო პროცესები. დიქტატორული რეჟიმებს ასეთ დროს, როგორც წესი სწრაფად და უმოკლეს ხანში გამოაქვთ განაჩენი, რადგან როდესაც არც ნორმალური მტკიცებულებები გაგაჩნია და მხოლოდ სინდისგარეცხილ ცრუმოწმეებს ეყრდნობი, როდესაც პროკურორიც და მოსამართლეც ხელისუფლების მასხარებად ჩანან და ბრალდებულთა მორალური უპირატესობა უკანასკნელი იდიოტისთვისაც კი თვალსაჩინოა, გაჭიანურებული პროცესი მხოლოდ ხელისუფლების პრესტიჟს აზიანებს და მისი მომხრეების უკმაყოფილებასაც კი იწვევს. არ მითხრათ ახლა, პროცედურულად არ გამოდის სხვანაირადო. ყველამ ვიცით რა სასამართლო სისტემაც გვაქვს და ისიც ვიცით, რომ როგორც ბატონ ბიძინას უნდა, პროცედურულადაც ისე გამოვა.
ეს კი ასეა, მაგრამ აქ ერთვება, თუ შეიძლება ასე ითქვას, სუბიექტური ფაქტორი.კერძოდ, არსებობს ცნობილი რუსული სენეტენცია, რომ ყველა საკუთარი გარყვნილების მიხედვით ფიქრობს (каждый думает в меру своей испорченности). ამ კუთხით თუ შევხედავთ, ქართული ოცნების მთელი ხელძღვანელი ვერტიკალისთვის ბრალდებულის სკამზე ჯდომა უკვე თავისთავად არის ისეთი დამცირება და მარცხი, რომ ამის პერმანენტულმა დემონსტრირებამ მათი აზრით ოპოზიციურად განწყობილი საზოგადოება უნდა გატეხოს და უიმედობაში გადააგდოს. თვითონ ხომ ზუსტად ასე დაემართებოდათ: შეშინდებოდნენ, უკან დაიხევდნენ, შეეცდებოდნენ გამომძვრალიყვნენ და პატიმრობისთვის თავი დაეღწიათ. ერთი წუთით წარმოიდგინეთ ასეთი სურათი: კობახიძე, მდინარაძე, პაპუაშვილი ან თუნდაც თავად ივანიშვილი საბრალდებო სკამზე აპროტესტებენ დიფსთეითის პოლიტიკურ ანგარიშსწორებას მათ მიმართ და ამ დროს დარბაზს გარეთ ქოცობა ღელავს და ისმის შეძახილები: “თავისუფლება ომის პარტიის რეჟიმის ტყვეებს!” წარმოიდგინეთ? ვერც მე.ამიტომაც ეგონათ ხელისუფლებაში, რომ სასამართლო პროცესების გაჭიანურება წინააღმდეგობას და პროტესტს ჩაახშობდა და დათრგუნავდა, რასაც მერე პროპაგანდა სათავისოდ გამოიყენებდა. უფრო მეტიც, დარწმუნებული ვარ, დღემდე არ ესმით რატომ არ ხდება ასე, მაგრამ რახან ფაქტის წინაშე დადგნენ, იძულებული არიან რაღაცნაირად ახსნან ეს და საკუთარი ბუნებიდან გამომდინარე, მათ უბრალოდ შეუძლებელია სხვა ახსნა ჰქონდეთ გარდა იმისა, რომ ყველაფერი შესაბამისი დაფინანასების შედეგია. დიდი ეჭვი მაქვს, ოხანაშვილის სუსი დღემდე გამალებით ეძებს დიფსთეითელ სპონსორებს, რომლებიც დიდძალ ფულს იხდიან პოლიტპატიმრების და მათი გულშემატკივრების გაუტეხელობაში. მართალია, ამ არარსებულ სპონსორებს ვერ პოულობენ, მაგრამ ეს მხოლოდ იმის მტკიცებულებაა მათთვის, რომ დიფსთეითის შენიღბვის ხარისხი ბევრად უფრო ღრმაა, ვიდრე აქამდე ეგონათ.
რა შეიძლება ამას ეშველოს? ჩემი მოკრძალებული აზრით, სანამ ეს ხელისუფლება გვყავს, არც არაფერი. ამდენი ხანია ეს ხალხი ხელისუფლებაშია და მათი საქმიანობიდან გამომდინარე, დღეს უკანასკნელი გონებაჩლუნგისთვისაც კი ცხადზე უცხადესი უნდა იყოს: ესენი ვერასდროს მიხვდებიან იმას, რომ ადამიანს ცხოვრებაში შეიძლება რამე სხვა მოტივაცია ჰქონდეს ძალაუფლების მოპოვებისა და ფულის შოვნის გარდა.
კომენტარები