სახელმწიფო უსაფრთხოების სამსახურის შენობაში დიდი ოდენობით თანხის გაფლანგვის ფაქტზე დაკავებული პირებისთვის ბრალის წაყენების პროცედურა მიმდინარეობს.
- საუბარია საქართველოს თავდაცვის მინისტრის ყოფილ მოადგილეზე, გიორგი ხაინდრავაზე, იმავე სამინისტროს შესყიდვების დეპარტამენტის ყოფილ უფროსზე, ვლადიმერ ღუდუშაურზე და თავდაცვის იმდროინდელი მინისტრის, ჯუანშერ ბურჭულაძის სავარაუდოდ ახლო ნათესავზე, ვასილ მხეიძეზე.
უწყებაში შესვლამდე კომენტარი ვლადიმერ ღუდუშაურის ადვოკატმა, ლევან სეფიაშვილმა გააკეთა და თქვა, რომ ის მისი დაცვის ქვეშ მყოფს ამ არ შეხვედრია, ამიტომ დეტალებზე ვერ ისაუბრებს.
„ამ ეტაპზე ვერაფერს მოგახსენებთ. მას არ შევხვედრივარ. შევხვდები, გავესაუბრები. პროცედურულ ნაწილთან დაკავშირებით ინფორმაციას მოგვიანებით მოგაწვდით“, – განაცხადა სეფიაშვილმა.
გამოძიება ჯუანშერ ბურჭულაძის გარემოცვას საქართველოს სახელმწიფო ბიუჯეტიდან 1 333 728 ლარის გაფლანგვას ედავება.
აღნიშნული ქმედება სასჯელის სახით 7-დან 11 წლამდე ვადით თავისუფლების აღკვეთას ითვალისწინებს.
კომენტარები