“არ არსებობს ჩოლოიანის ბრალეულობა – მოწმეები არ და ვერ საუბრობენ”

15 წლის ლუკა სირაძის გარდაცვალების საქმეზე დაკავებული გამომძიებელი, მარიანა ჩოლოიანი ჯანმრთელობის მდგომარეობიდან გამომდინარე, ექიმების მეთვალყურეობის ქვეშ იმყოფება. ამის შესახებ ჟურნალისტებს ბრალდებულის ადვოკატმა, გაგი მოსიაშვილმა განუცხადა.

მისივე თქმით, დღევანდელ სხდომაზე ბრალდების მხარის ერთი მოწმე დაიკითხება.

„უკვე ათეულობით მოწმეა დაკითხული. მაგრამ ისინი არ და ვერ საუბრობენ მის ბრალეულობაზე. ერთი მარტივი მიზეზის გამო – არ არსებობს მისი ბრალეულობა, წარდგენილ ბრალთან დაკავშირებით,“

დღევანდელ სხდომას ბრალდებული, მარიანა ჩოლოიანიც დაესწრება.

“ალია” – იმ შემთხვევაში, თუ სასამართლო და პროკურატურა აპირებს “დაამტკიცოს” რომ მარიანა ჩოლოიანი უდანაშაულოა, პასუხისგება მოუწევს სახელმწიფო ინსპექტირების სამსახურს, რომლმაც თავიდანვე განაცხადა, რომ იყო სერიოზული დარღვევები დაკითხვის პროცესში.

მართალია, ადვოკატის თქმით, უკვე ათეულობით მოწმეა დაკითხული, მაგრამ გამომდინარე იქედან რომ შემთხვევა მოხდა პოლიციის განყოფილებაში – უნდა ვივარაუდოთ რომ მოწმეთა უმეტესობა პოლიციელები არიან. მისცემენ თუ არა ჩვენებას პოლიციელები თავიანთი თანამშრომლის წინააღმდეგ, მით უფრო, თუ თავადაც შეესწრენ ფაქტს და თანამონაწილეობა ემუქრებათ, სადაოა.