“მშვიდობა სიძლიერით” – ტრამპი სახელმწიფო მდივნის თანამდებობაზე მარკო რუბიოს დანიშნავს

აშშ-ის ახლადდანიშნული პრეზიდენტი დონალდ ტრამპი სახელმწიფო მდივნის თანამდებობაზე, ფლორიდის ამჟამინდელ სენატორს, მარკო რუბიოს დანიშნავს – ამის შესახებ მის განცხადებაშია საუბარი.

“ჩემთვის დიდი პატივია, გამოვაცხადო, რომ ფლორიდის სენატორი, მარკო რუბიო, აშშ-ის სახელმწიფო მდივნის თანამდებობაზეა წარდგენილი. ის უაღრესად პატივცემული ლიდერი და ძლიერი ხმაა თავისუფლებისთვის. ის ჩვენი ერის ძლიერი ადვოკატი, ჩვენი მოკავშირეების ჭეშმარიტი მეგობარი და უშიშარი მეომარი იქნება, რომელიც ჩვენს მოწინააღმდეგეებთან უკან არასდროს დაიხევს. მოუთმენლად ველოდები მარკოსთან ერთად მუშაობას, რათა ამერიკასა და მსოფლიოს უსაფრთხოება და დიდება კვლავ დავუბრუნოთ!” – წერია ტრამპის განცხადებაში. 

რუბიო პლატფორმაზე X წერს, რომ მისთვის პატივია პრეზიდენტ ტრამპის მხრიდან გამოცხადებული ნდობა, და რომ იგი ყოველდღიურად იმუშავებს ტრამპის საგარეო პოლიტიკის პროგრამის განსახორციელებლად. ტრამპის ლიდერობის პირობებში “ჩვენ მოვიტანთ მშვიდობას სიძლიერით და ამერიკელების და ამერიკის ინტერესებს ყოველთვის ყველაფერზე წინ დავაყენებთ” – წერს რუბიო.

მარკო რუბიო ჩინეთისა და ირანისადმი მკაცრი პოზიციითაა ცნობილი.

რუბიოს ბოლო პერიოდის ინტერვიუებში არაერთხელ უთქვამს, რომ უკრაინაში ომის დასრულების გზად მიიჩნევს მოლაპარაკებას, რომლისთვისაც კიევს უნდა ჰქონდეს ზემოქმედების რაც შეიძლება მეტი ბერკეტი.

მან 2022 წელს პუტინს სამხედრო დამნაშავე უწოდა და განაცხადა, რომ მას უკრაინაში გამარჯვება არ ელის.