“ივანიშვილი გამსახურდიას პერიოდსაც გამოიძიებს?” – ვანო აბრამიშვილი

ქართულ-აფხაზური და ქართულ-სამხრეთ ოსური კონფლიქტების წარსულისა და აწმყოს მკვლევარი, ვანო აბრამიშვილი:

„26 ოქტომბრის არჩევნების დასრულებისთანავე, როდესაც ომის გამჩაღებლები გასამართლდებიან, როდესაც უკლებლივ ყველა დამნაშავე ქართულ-ოსური ძმობისა და თანაცხოვრების დანგრევისთვის უმკაცრეს სამართლებრივ პასუხს მიიღებს, ჩვენ აუცილებლად გამოვძებნით საკუთარ თავში ძალას, რათა ბოდიში მოვიხადოთ იმის გამო, რომ დავალების შესაბამისად, მოღალატე ნაციონალურმა მოძრაობამ 2008 წელს ცეცხლის ალში გახვია ჩვენი ოსი დები და ძმები“ – განაცხადა ივანიშვილმა დღეს გორში.

ამას ამბობს ადამიანი, რომელიც არანაირ არჩევით თანამდებობას არ იკავებს, უბრალოდ მმართველი პარტიის საპატიო თავმჯდომარეა და არანაირი ლეგიტიმაცია არ აქვს ხალხის სახელით რაიმე ბოდიშის მოხდაზე საუბრობდეს. მეორეც, იყო ეს შეთანხმებული იმ ადამიანებთან ვისაც უმთავრესი მორალური უფლება აქვთ მათი სახელით ილაპარაკონ? მაგალითად ვეტერანებთან? იძულებით გადაადგილებულ პირებთან? უგზო-უკვლოდ დაკარგულთა ოჯახის წევრებთან?

გულწრფელი ბოდიშის მოხდა და შერიგება კონფლიქტის დარეგულირების ბოლო სტადიაა, რომელიც ათეული წლები შეიძლება გაიწელოს და რეალურად ემსახურება მომავალს რათა ერთობლივი თანაცხოვრებისას წარსული დანაშაულები აღარ განმეორდეს. ამას საფუძვლად უნდა ედოს მთელი სამართლებრივი, ფინანსური, და კულტურული ინფრასტრუქტურა. აუცილებელია კონფლიქტის ყველა მხარის თანამშრომლობა რათა წარიმართოს საფუძვლიანი გამოძიება და დაისაჯონ დამნაშავეები, მსხვერპლებმა მიიღონ შესაბამისი მორალური და მატერიალური კომპენსაცია. როგორც წესი ამ დროს იქმნება სიმართლის დამდგენი კომისიები სადაც ჩართულები არიან სამოქალაქო პირები, რელიგიური ლიდერები და ა.შ. იმართება საჯარო დისკუსიები, განათლების სისტემაში იცვლება მიდგომები. მსგავსი ვერაფერი ვერ მოხდება ოკუპაციის პირობებში და შესაბამისად უსაფუძვლო და მლიქვნელურ ბოდიშზე საუბარი გაუგებარი და შეურაცხმყოფელია ჯერ ქართველი ხალხისთვის და მერე ამნაირ ბოდიშს არც ოსები მიიღებენ. არავინ შტერი და სულელი არაა.

„ქართულ-ოსური ძმობისა და თანაცხოვრების დანგრევა“ გვიანი 80-იანებსა და ადრეული 90-იანი წლებიდან იწყება. ანუ ივანიშვილი გამსახურდიას პერიოდსაც გამოიძიებს? რუსეთს რა პასუხისმგებლობას დააკისრებს?

ცხადია ამ კითხვებზე არანაირი პასუხები არ არსებობს და ეს ყველაფერი ერთი დიდი უაზრობაა. საკუთარი ხალხისგან რომ გაუცხოებული არ იყოს ამნაირ სისულელეებს არც ილაპარაკებდა ეს ადამიანი. აქვე ვიცოდეთ რომ ის ვინც აფხაზებს და ოსებს „დებად და ძმებად“ მოიხსენიებს აზრზე არაა კონფლიქტების საკითხების.