“დასავლეთის უცხო ძალად აღიარებით ოცნება გვთხოვს, რუსეთის სამსახურში ჩავდგეთ” – თავისუფლების ინსტიტუტი

უკანონობის დაკანონებით საზოგადოებრივ გაერთიანებებს აიძულებენ არა მხოლოდ უცხო ძალების ინტერესების გამტარის იარლიყი მიიკრან, არამედ დასავლეთის უცხო ძალად აღიარებით ქართული ოცნება გვთხოვს, რომ ვუღალატოთ სამშობლოს და რუსეთის სამსახურში ჩავდგეთ, უარვყოთ ჭეშმარიტება საკუთარი ვინაობის შესახებ, დავირქვათ ის, რაც არ ვართ და ჩვენივე ხელით ღირსება ავიყაროთ.

ვიცხოვროთ კანონის შესაბამისად არის არა მხოლოდ ჩვენი უფლება, არამედ ვალდებულება. როცა სხვადასხვა კანონი ერთმანეთს ეწინააღმდეგება, ვალდებული ვართ უზენაეს კანონს მივყვეთ და დროებითი და წარმავალი ხელისუფლის კაპრიზები უგულვებელვყოთ.

ჩვენ უზენაეს კანონს – ბუნებით სამართალს ვემორჩილებით და სწორედ ეს კანონი გვიკრძალავს, რომ თვითსტიგმატიზებით ხელისუფლებაში მოკალათებულ ბოროტ ტროლებს დევიანტური სიამოვნება მივანიჭოთ.

ლეგიტიმური ხელისუფლება არის ნდობა, რომელსაც ხალხი პოლიტიკოსებს საერთო სიკეთის მსახურებისთვის ანიჭებს. როცა მინდობილ რესურსებსა და ინსტრუმენტებს ხელისუფლება კერძო ინტერესისათვის იყენებს, ის ლეგიტიმურობას კარგავს და ტირანიად იქცევა.

ქართული ოცნება ამაზე შორს მიდის და გვევლინება როგორც საოკუპაციო ძალა, რომლისთვისაც არა მხოლოდ უცხოა ყველაფერი, რაც საქართველოს საქართველოდ აქცევს, არამედ მიზნად ისახავს ყველა იმ სიწმინდის შებღალვასა და აბუჩად აგდებას, რისთვისაც ქართველი ხალხი საუკუნეების მანძილზე თავს სწირავდა.

საქართველო იყო, არის და იქნება დასავლური ცივილიზაციის ნაწილი. ამ ღირებულებების დაცვა, რასაც ჩვენი საზოგადოება ემსახურება, უცხო ძალების ინტერესების გატარება კი არა, უძველესი ქართული ტრდაციის ერთგულებაა.

თუკი რამეა ქართული კულტურისთვის უცხო, ეს დასავლეთის მტრად გამოცხადება და კუდიანებზე ნადირობაა.

რუსული კანონი არის ამბოხება ჭეშმარიტებისა და ისტორიის წინააღმდეგ. თავისუფლების ინსტიტუტი უარს ამბობს შეუერთდეს ამ ღალატს.

ბუნებითი სამართლი და თავისუფლება ქართული და, მაშასადამე, უნივერსალური ღირებულებებია. ამ ღირებულებებისათვის ბრძოლას ყველა ლეგიტიმური საშუალებით გავაგრძელებთ და არც ერთი ნაბიჯით უკან არ დავიხევთ.