ანტიკრიზისული გეგმის წარდგენისას, პრემიერმა გიორგი გახარიამ განაცხადა, რომ საქმიანობებზე შეზღუდვები ეტაპობრივად, ორ კვირაში ერთხელ მოიხსნება.
სულ დაასახელა 6 ეტაპი და თქვა რომ ეტაპებს შორის სხვაობა იქნება 2 კვირა.
გამოდის 12 კვირა – ანუ 84 დღე და დაახლოებით – ივლისის 10 რიცხვებამდეა გაწელილი შეზღუდვების მოხსნათა ეტაპი.
აგვისტოს დასაწყისში საგანგებო მდგომარეობა თუ არ მოიხნება – არჩევნებს შეექმნება საფრთხე – ასე რომ, არჩევნებამდე 60 დღით ადრე საგანგებო მდგომარეობას ნამდვილად მოხსნიან.
დაახლოებით ასე აქვს პრემიერს, როგორც ჩანს გათვლილი.
თუმცა, არის რამდენიმე რეკომენდაცია, რომელსაც, როგორც პრემიერი ამბობს, წლობით დავიცავთ და მას ჰქვია – სავალდებულო წესები:
როდის მოიხსნება კომენდანტის საათი?
თუ დააკვირდებით ექვსი ეტაპიდან – არც ერთ ეტაპზე არ არის საუბარი კომენდანტის საათის მოხსნაზე, 70 წელს გადაცილებულ ადამიანთათვის შეზღუდვის მოხსნაზე და საზოგადოებრივი ტრანსპორტის მუშაობის აღდგენაზე!
ვერ ვიტყვით, რომ დაავიწყდა, რადგან, პრემიერს ჰკითხეს საზოგადოებრივ ტრანსპორტზე, მეტროსა და ავტობუსზე და უპასუხა, რომ ჯერ არ იცის.
იცის, როდის გახსნის კაზინოს – მაგრამ, როდის დაიწყებს მეტრო მუშაობას – არ იცის.
იცის როდის გახსნის რესტორნებს – მაგრამ, როდის დაიწყებს ავტობუსი ქალაქში მგზავრების გადაყვანას, ქალაქიდან ქალაქში მგზავრების გადაყვანას – ეგ არ იცის.
რაც შეეხება 70 წელს გადაცილებულ ადამიანებს, მათზე შეზღუდვა კიდევ დიდხანს გასტანს, რადგან პრემიერმა თქვა, რომ ხანდაზმულ ადამიანებს განსაკუთრებულად უნდა გავუფრთხილდეთ და ჩვენ უკვე ვნახეთ, რას ნიშნავს პრემიერის ზრუნვა. სამაგიეროდ პენსიონრებს 2021 წლიდან პრემიერი გახარია 20 ლარს მოუმატებს, ხოლო 70 წელს გადაცილებულ პენსიონრებს 25 ლარს.
აი, კომენდანტის საათზე, არ ვიცი როდის მოიხსნებაო ეგაც არ თქვა. როგორც ჩანს, უახლოეს მომავალში კომენდანტის საათი არ მოიხსნება, რადგან საღამოს ცხრა საათიდან დილის ექვს საათამდე გარეთ საშიში ვირუსი დადის და სწორედ კომენდანტის საათის გამო ვერ შლის კარავს პარლამენტის შენობის წინ.
შეგახსენებთ ასევე, რომ საგანგებო მდგომარეობისა და კომენდანტის საათის დამრღვევთათვის ზომები გამკაცრდა და განმეორებით ვინც დაარღვევს საგანგებო მდგომარეობის წესებს 6 წლამდე ციხე ემუქრება.
მართალია, ანრი ოხანაშვილმა თქვა, რომ ტყუილია, ამ საგანგებო მდგომარეობის გამო არ შემოგვიღია ეგ კანონი, ზოგადად საგანგებო მდგომარეობის, ან საომარი მდგომარეობის წესების დარღვევისთვის შემოვიღეთო – მაგრამ, იმის გათვალისწინებით, რომ საგანგებო მდგომარეობა იშვიათად გვაქვს ქვეყანაში და ღმერთმა გვაშოროს საომარი მდგომარეობა – ძალიან გვინდა ფიცის გვჯეროდეს, მაგრამ…
აქვე ისევ გთავაზობთ გრაფიკს – რომელ ეტაპზე რა აკრძალვა მოიხსნება:
პირველი ეტაპი – 27 აპრილიდან იწყება
მსუბუქი ავტომობილებით გადაადგილება;
ტაქსების ოპერირება;
ონლაინ ვაჭრობა სრულად;
მიტანის სერვისი ნებისმიერ პროდუქტზე;
ღია ტიპის აგრარული ბაზრების საქმიანობა.
მეორე ეტაპი – 11 მაისიდან
მშენებლობა;
სამშენებლო ზედამხედველობასთან დაკავშირებული საქმიანობა;
სამშენებლო მასალების წარმოება;
ავტოსამრეცხაოები/ავტოსერვისები;
კომპიუტერის, პირადი და საყოფაცხოვრებო საქონლის რემონტი;
სარეკრეაციო ზონების ფუნქციონირება.
მესამე ეტაპი – 25 მაისიდან
საცალო და საბითუმო მაღაზიები, გარდა მოლებისა, რომლებსაც გააჩნიათ დამოუკიდებელი შესასვლელი ქუჩიდან.
ყველა ტიპის ღია ბაზრობა.
საგამომცემლო საქმიანობა.
მეოთხე ეტაპი – 9 ივნისიდან
სავაჭრო მოლები;
ღია ტიპის რესტორნები/კვების ობიექტები (ადგილზე მომსახურებით);
ყველა ტიპის საფინანსო მომსახურება;
სილამაზის სალონები და ესთეტიკური ცენტრები;
მეხუთე ეტაპი – 23 ივნისიდან
დახურული ტიპის ბაზრები;
ყველა ტიპის რესტორნები/კვების ობიექტები (ადგილზე მომსახურებით.)
მეექვსე ეტაპი – 7 ივლისიდან
გასართობი, სპორტულ გამაჯანსაღებელი, შემოქმედებითი საქმიანობა;
აზარტული და სხვა მომგებიანი სათამაშო ბიზნესი;
სასტუმროები;
საგანმანათლებლო საქმიანობა;
ყველა სხვა საქმიანობა არადისტანციურ რეჟიმში.
ალია
კომენტარები