“გვარამია ოპოზიციის სხვა ლიდერებთან შედარებით ნამდვილი ვარსკვლავია, უბრალოდ, მის წინააღმდეგ ორი ფაქტორი მუშაობს” – ლორთქიფანიძე

პოლიტოლოგი, ლევან ლორთქიფანიძე, ინტერპრესნიუსთან ამბობს

“ნიკა გვარამია ოპოზიციის სხვა ლიდერებთან შედარებით ნამდვილი ვარსკვლავია. მას მრავალმილიონიანი კაპიტალის მართვის გამოცდილება აქვს, ეფექტიანად უხელმძღვანელია სახელმწიფო და კერძო დაწესებულებებისთვის. სატელევიზიო საქმიანობის დროს მოიპოვა ნდობა ანტისამთავრობო ბანაკის ყველა სექტორში, მას პატივს სცემენ ოპოზიციონერი პოლიტიკოსებიც, ჟურნალისტებიც და სამოქალაქო აქტივისტებიც.

აღსანიშნავია, მისი საერთაშორისო კავშირებიც, გვარამიას იცნობენ ვაშინგტონშიც, ბრიუსელშიც და კიევშიც. რაც მთავარია, მისი მორალური სტანდარტები კატეგორიულად მიუღებელია ჩემთვის და ჩემნაირი მოქალაქეებისთვის, თორემ ენმ-ის რიგითი მხარდამჭერები მას თავდადებულ რაინდად აღიქვამენ.

ოპოზიციურ ფლანგზე ნიკა გვარამიას ავტორიტეტის გამყარებას ხელი მისმა პატიმრობამაც შეუწყო. ხელისუფლებამ აშკარად გაუგებარი და დაუსაბუთებელი, ბევრისთვის სასაცილო ბრალდებით გამოამწყვდია იგი საპატიმრო დაწესებულებაში. ამასთანავე, მან სააკაშვილისგან განსხვავებით პანიკისა და სამარცხვინო შიშის გარეშე აიტანა მისთვის გამოტანილი განაჩენი.

მოკლედ, ნიკა გვარამიას ნამდვილად შესწევს ძალა დღევანდელი ოპოზიციის მობილიზებისა და უკეთ ორგანიზებისა. უბრალოდ, მის წინააღმდეგ ორი ფაქტორი მუშაობს. მერაბიშვილი-კეზერაშვილის წყვილის ინტერესებში ნამდვილად არ შედის დამოუკიდებელი, მათგან გაუკონტროლებელი ფიგურის პოლიტიკურ ველზე დაწინაურება. მათ მხოლოდ მარიონეტებთან სურთ მუშაობა. პარალელურად, არც სააკაშვილს უნდა აწყობდეს იმ ადამიანის დამსახურებების აღიარება, რომელმაც ექს-პრეზიდენტისგან განსხვავებით ციხეში ყოფნისას მხოლოდ ბორხესის მოთხრობების კრებული მოითხოვა.”