“შენ ტოვებ პარტიას…” – ვის მიმართავს მელია და რით დაემსგავსა “ენმ” “ოცნებას”?

ნაციონალური მოძრაობის ყოფილი თავმჯდომარე, ნიკა მელია, ტვ პირველთან, ჟურნალისტ, ინგა გრიგოლიას კითხვებს პასუხობს.

ინგა გრიგოლია:

–დავარცხნილ, დაბანილ კითხვებს შევეშვათ, პირდაპირ მიპასუხეთ შეკითხვაზე – პარტიას ტოვებთ თუ არა და აპირებთ თუ არა ახალი პოლიტიკური გუნდის გაკეთებას, ვერ დავიჯერებ, თუ მეტყვით არაო, მაყურებელს ნანახი აქვს თქვენი ცალკე ოფისი, იქ ადამიანების შეკრება, ეს ყველაფერი იმაზე მეტყველებს, რომ ნიკა მელიას აქვს გადაწყვეტილი ნაციონალური მოძრაობის დატოვება.

ნიკა მელია:

–ამ პარტიას შემოვუერთდი 2013 წელს, მჯეროდა რომ პარტიას ჰქონდა მანკიერების დამარცხების რესურსი. მაშინ, ამოცანა იყო ის, რომ პარტია უნდა გადარჩენილიყო და გადარჩა. შეგნებული არჩევანი გავაკეთე და უკანასკნელი წლები, ძალიან ბევრი რამ გავაკეთე. თუკი ვინმემ მართლა დატოვა პარტია, ფასეულობების და ღირებულებების თვალსაზრისით, ბევრმა ჩემმა თანამებრძოლმა. პარტია არის იდეური ერთობა. როდესაც შორდები ამ ღირებულებებს, ჩემი აზრით, შენ ტოვებ პარტიას. ერთი ნაბიჯი არ გადამიდგამს განზე ღირებულებებიდან და გულწრფელი ვარ იმ ბრძოლაში, რაშიც ჩავები 2013 წლიდან. მე პარტიაში ვიქნები თუ პარტია იქნება იმ ღირებულებებზე, დიახაც, ვიქნები, რადგან ამ პარტიისთვის ბევრი მაქვს გაკეთებული. გამიგია ქვეყნის პატრიოტიზმი, მაგრამ არ გამიგია პარტიის პატრიოტიზმი. სანამ ვხედავ თუნდაც მცირე, თეორიულ შანსს, რომ ეს პარტია გადარჩეს ფასეულობების მხრივ, როგორც გადარჩა წლების წინ, ბუნებრივია მე ვიქნები იქ, სადაც ვხედავ, რომ პარტია არის ინსტრუმენტი, რომ შენი იდეები განახორციელო.

ინგა გრიგოლია:

–თუკი ღირებულებებისგან დაიცალა, არადემოკრატიულია პროცესები, რა გინდათ ეგეთ პარტიაში?

ნიკა მელია:

–განგებ არ გამოვჩენილვარ ბოლო თვეების მანძილზე, არ მინდოდა, ვინმეს თვალში ისე წარმოვჩენილიყავი, როგორც ჯოხი ბორბლებში და ხელისშემშლელი, განგებ ავიღე საჯარო გამოსვლების პაუზა, თორემ ბევრ და ბევრ ახალ ადამიანს ვხვდები. დღეს პარტია არის უმძიმეს მდგომარეობაში, ვიდრე ოდესმე ყოფილა. რაც არ უნდა თქვან ყოფილმა თანამებრძოლებმა, ყოფილმა, იმიტომ რომ ღირებულებითი დისტანცია შეიმჩნევა, ვინარჩუნებთ მხოლოდ საგარეო კურსის საერთო ღირებულებას, სხვა მხრივ, რაც დრო გადის, სულ უფრო და უფრო მეტი საერთო ნიშანი აქვს ახალი მენეჯმენტის ნაციონალურ მოძრაობას და ქართულ ოცნებას.

ინგა გრიგოლია:

–მძიმე ბრალდებაა ნიკა…

ნიკა მელია:

–დაწყებული იმ მოდელით პარტიის მართვის, რასაც მე პირადად 11 წელია ვებრძვი, მჯერა, რომ არაფორმალურად პარტია არ უნდა იმართებოდეს. დღეს იმართება, თუ იმართება არაფორმალურად. პრობლემაა, რომელიც უკავშირდება პარტიის სოლიდურობას, პარტიამ დაკარგა პერსპექტივა, ზრდის პოტენციალი, პარტია ემსგავსება კლანური, კაპიტალით, მხოლოდ ფინანსური სახსრებით მართულს. ეს არ არის ის, რისთვისაც იბრძოლა ნაციონალური მოძრაობის ამომრჩეველმა. არაფორმალური მმართველობა კიდევ აკადემიურად ჟღერს, მეორეა კლანური მმართველობა, ხო? ვფიქრობ, პრობლემა, რომელიც ნაციონალურ მოძრაობას დაუდგა, არც თუ ბუნებრივად დადგა.