„ეს ორივე ვარიანტი მეტ–ნაკლებად გამართლებული და მისაღებია“ – რას ამბობს ვალერი გელბახიანი

ლევან ჯავახიშვილი

„ალიას“ ესაუბრება ადვოკატი, ყოფილი პარლამენტარი, ვალერი გელბახიანი.

– ბატონო ვალერი,  სავარაუდოდ, „ქართული ოცნების“  დეპუტატები ტოვებენ პარტიას – დავით სერგეენკო, ნინო იობაშვილი, გიორგი ხელაშვილი, ვლადიმერ ჩაჩიბაია და ირაკლი კოვზანაძე. ვინც პარტიიდან  წავა მათ დაატოვებინებენ პარლამენტარის  მანდატს. ხელისუფლებას სურს, მათ ნაცვლად,  უფრო მორჩილი დეპუტატები შეიყვანოს პარლამენტში?

– ეს მოსალოდნელი იყო, რადგან ვინც „აგენტების“ კანონს ხმა არ მისცა, იმათ მაინც გაუშვებდნენ და კარგი ქნეს, თავად რომ წავიდნენ. „ქართულ ოცნებას“ ამ ეტაპზე უმრავლესობის პრობლემა არ აქვს. ეს  ხუთი დეპუტატი  მანდატებს თუ არ დატოვებს, „ქართულ ოცნებას“ უმრავლესობის პრობლემა არ შეექმნება, 81 დეპუტატი ეყოლება „ხალხის ძალის“ ჩათვლით. ასევე, მაგათია  „პატროტთა ალიანსის“  3 დეპუტატი. ფრიდონ ინჯია ვისია? „ოცნებისაა“,  აბა, ოპოზიციაა? რა ბევრი ლაპარაკი უნდა მაგას. ჯერ ვნახოთ, საქმე ბოლომდე მოვიდეს, ყველა პროცედურა გაიარონ ამ წამსვლელმა დეპუტატებმა. უთხრეს, თუ წახვალთ „ქართული ოცნებიდან“, მანდატებიც დატოვეთ, რადგან თქვენ  ნაცვლად სხვები  გახდნენ დეპუტატებიო.  მეც ეგრე გავიგე, მაგრამ ჯერ კენჭისყრა არ ყოფილა მათი სადეპუტატო უფლებამოსილების  შეწყვეტის შესახებ.  ჯერ შუწყვიტონ უფლებამოსილება, წავიდნენ და დავინახავთ, რა და როგორ მოხდება შემდგომში. თუ აიძულებებ, დატოვონ მანდატებიც და არა მარტო პარტია,  მერე მაგასაც ვნახავთ.

– ერთ შარს მაინც ვერ ასცდებიან – დავით სერგეენკო საბურთალოს მაჟორიტარი დეპუტატია, ის ნამდვილად ტოვებს მანდატს. საბურთალოზე შუალედური  მაჟორიტარული არჩევნები გაიმართება და „ქართულ ოცნებას“, ვფიქრობ, დიდი ბრძოლის გადატანა  მოუწევს ოპოზიციასთან. არა?

– კი, ეგ იმ შემთხვევაში, თუ ოპოზიცია შეთანხმდა საერთო კანდიდატზე. ერთი მანდატი არც ერთს არაფრად უღირს, მაგრამ მათი მომხრეებისთვის დიდი ფსიქოლოგიური მნიშვნელობა ექნება იმას, თუ ვინ მოიგებს საბურთალოზე არჩევნებს.  სხვა აზრს მე ამ არჩევნებში ვერ ვხედავ. თუმცა, მე თუ მკითხავთ, ოპოზიციამ საერთოდაც არ უნდა მიიღოს არჩევნებში მონაწილეობა. უნდა თქვას, რომ მაჟორიტარული წესით არჩევნებს ბოიკოტს უცხადებენ, მხოლოდ პროპორციულ არჩევნებში მიიღებენ მომავალში მონაწილეობას და დატოვონ „ქართული ოცნების“ კანდიდატი კონკურენტის გარეშე. ეს პოლიტიკური აქტიც იქნება და სამართლიანიც. ორივე ვარიანტი მეტ–ნაკლებად გამართლებული და მისაღებია. კი, შესაძლოა კონკურენტები გამოუჩნდეს „ქართული ოცნების“ კანდიდატს, , ათასი პარტიაა და მათი კანდიდატები იყრიან კენჭს, მაგრამ ეს არ იქნება  იმ  ოპოზიციის კანდიდატი, რომელზეც ვსაუბრობთ.  მთავარია, არ დაიქსაქსოს ოპოზიცია, იმ ოლქში რამდენიმე კანდიდატი არ დააყენონ ოპოზიციურმა პარტიებმა. ეს ყველაზე უარესი სცენარია. ამით „ქართული ოცნების“ კანდიდატი მოიგებს არჩევნებს. მერე, „ქართულ ოცნებას“ სალაპარაკო მიეცემა, რომ ოპოზიცია დაამარცხა, თან  ერთდროულად მათი რამდენიმე კანდიდატი ერთად. ოპოზიციას კი, ისედაც დაბალი რეიტინგი უფრო დაუვარდება, დაკარგავენ მომხრეებს. თუმცა, იმედი მაქვს, ამ ყველაზე უარეს ვარიანტზე არ წავა ოპოზიცია.