“ვაჰ, რა კარგი ამბავი, მაგარი ამბავი… რატომ არ ვსაუბრობთ მასზე, ჰა?” – გუჯა ბიძია

“ვაჰ, რა კარგი ამბავი, მაგარი ამბავი.

მსოფლიო “ოქროს წერაყინი” აუღიათ ჩვენს ალპინისტებს,

პაკისტანში, აქამდე მიუვალ მწვერვალ სარაგრარზე (Saraghrar Northwest 7,300m) ძალიან დიდი სირთულის მარშრუტის განხორციელებისთვის.

აგერ, შემთხვევით რომ არ მომეკრა თვალი ვერც გავიგებდი ამ ამბავს,

და რატომ არ ვაქცევთ ყურადღებას ქართულ ალპინიზმს არ მესმის მართლა.

პრესა და ტელევიზია ჯანდაბას, ჩვენ რატომ არ ვსაუბრობთ მასზე, ჰა?

დრო იყო მაგარ თემაში იყო ეს სპორტი, მამების თაობისთვის მაინც, და სამართლიანადაც.

რა სპორტი, მე თუ მკითხავთ სპორტზე მეტია ალპინიზმი.

თუ ჭეშმარიტი ქართული ფეხბურთი ხელოვნებაა, და თუ ქართული ჭიდაობა და ქართული რაგბი ქართული მეომარი სულის გამოვლინება, მაშინ ქართული ალპინიზმი, ყველაფერია ერთად და მეტიც, ქართული ზნეობაა ცამდე აწეული, რადგან ღირსეული თუ არა ხარ, და სხვისთვის სიცოცხლის გაწირვა არ შეგიძლია, ვერც ვერასოდეს ვერ ახვალ მწვერვალზე.

ეგაა,

მიხეილ ხერგიანის სული ალბათ დღესასწაულობს ახლა.

გურამ თიკანაძის და გურამ რჩეულიშვილის სულებიც,

და მათი მსგავსი კიდევ ბევრი რომ დაიბადოს, ბევრი უნდა ვისაუბროთ დღევანდელებზეც, –

არჩილ ბადრიაშვილზე, გიორგი ტეფნაძეზე, ბაქარ გელაშვილზე.

გაგიმარჯოთ ღმერთმა!

მადლობა ბიჭებო!”