“ელემენტარული უსაფრთხოების ნორმები იყო დარღვეული” – შოთა ნიჟარაძე ვაკის პარკში მომხდარ ტრაგედიაზე

შრომის უსაფრთხოების ასოციაციის პრეზიდენტი, შოთა ნიჟარაძე, “ტვ პირველთან” ვაკის პარკში მომხდარ ტრაგედიაზე საუბრისას, ამბობს:

“გაოგნებულები ვართ, 21–ე საუკუნეში შადრევანში შეიძლება მოხდეს ასეთი ტრაგიკული შემთხვევა.

ჩვენ არ ვსაუბრობთ რთულ, საინჟინრო ნაგებობაზე, ელემენტარული უსაფრთხოების ნორმები იყო დარღვეული, ეს რატომ მოხდა თავიდანვე არასწორად იყო ტექნიკური დავალება შედგენილი, თუ შემდეგ იქნა დარღვევა, დასადგენია. ჯერ ამხელა, 200 ვოლტის ძაბვას რა უნდოდა საერთოდ მანდ?

ისიც არ ვიცით, იყო თუ არა და თუ იყო, იმუშავა თუ არა ე.წ. გაჟონვის რელემ, რომელსაც უნდა დაეზღვია რამე თუ მოხდებოდა. საერთო სურათს რომ შევხედოთ არაკომპეტენტურობის და უპასუხისმგებლობის ამბავია. სამწუხაროდ წლებია საქართველოში პრიორირტეტი არ არის ხარისხი და უსაფრთხოება.

პირველ რიგში უნდა ყოფილიყო სწორად დაპროექტებული, შესრულებული, დამიწება, გაჟონვის რელე – ეს მინიმალურია. ინოვაციური ტექნოლოგიის მოგონება არ იყო საჭირო, კვალიფიციური ხალხის მიერ უნდა გაკეთებულიყო და შემოწმებულიყო. ყველას არ შეუძლია გარკვეული სამუშაოების შესრულება, უნდა გაკონტროლებულიყო, მაღალი დონის კვალიფიციური მუშახელით უნდა შესრულებულიყო სამუშაო.

ზოგადად უსაფრთხოებაში ყველაა პასუხისმგებელი, დამკვეთიც, შემსრულებელიც, შემმოწმებელიც. უამრავი სამსახურია მერიაში, რომელსაც ასეთი ხარვეზი არ უნდა გამოპარვოდათ. არ მჯერა რომ ექსპლუატაციაში შესვლის შემდეგ რაღაც ისეთი ხარვეზი მოხდა… დიდი ალბათობით, გამორჩათ.

ვიმეორებ, ეს არ არის რთული ტექნიკური, საინჟინრო ამოცანა, ძალიან მარტივია და ასეთი შადრევნები საქართველოშიც უამრავია და უცხოეთშიც. არ შეიძლება 21–ე საუკუნეში, უბრალო, ელემენტარული უსაფრთხოების წესების დაუცველობის გამო, ასეთი რამეები ხდებოდეს.”