ლევან ჯავახიშვილი
„ალიას“ ესაუბრება პოლიტიკური მოძრაობა „ტრიბუნას“ ლიდერი, დავით ჭიჭინაძე.
-„ქართული ოცნებიდან“ გასული დეპუტატები საზოგადოებრივი მოძრაობის ჩამოყალიბებას აპირებენ, ეს თავად განაცხადეს. მაქვს ინფორმაცია, რომ შესაძლოა, მომავალში პარტიაც შექმნან და სოზარ სუბარი გახდეს მისი თავმჯდომარე. შესაბამისად, არჩევნებშიც მიიღებენ მონაწილეობას. რა ფუნქცია ექნება ახალ პარტიას, თუ მართლა ასე მოხდა?
– ძვირფასი „ალიას“ მოცდენა ამ კიდევ ერთი უაზრობის აღსაწერად და გასაანალიზებლად ნამდვილად არ ღირს. ამ ქვეყანას გაცილებით მეტი პრობლემა აქვს, ვიდრე ყაველაშვილის, სუბარის და მათი გეგმების შესახებ საუბარი. ჯერ სამნი იყვნენ, ახლა ოთხნი გახდნენ და მალე გახდებიან ათნი, ოცნი… მე პირდაპირ გეტყვით. ქვეყანას აქვს უდიდესი პრობლემები მიგრაციის, დემოგრაფიის, სოციალურ-ეკონომიკური კუთხით და კიდევ სხვა უამრავი. ეს პრობლემები არსად გაქრება. რაც არ უნდა ივანიშვილმა დაშალოს და ააწყოს, ითამაშოს „ქართული ოცნებით“, ახალი და საინტერესო მაინც არაფერი გამოვა აქედან. რომელი აზრის ტიტანები ეს „განდგომილი დეპუტატები“ არიან, რომ საზოგადოებას რაიმე ახალი შესთავაზონ? თუ რაიმე იდეები ჰქონდათ, „ქართულ ოცნებაში“ ყოფნისას ეთქვათ, ვინმე უშლიდა? ისევ ძველი და ნაცადი ტყუილებით ცდილობენ რაღაცებს, ახალს ვერაფერს იგონებენ. ეს დეპუტატები სხვისი გეგმის განხორციელებაში ღებულობენ მონაწილეობას და რაც უფრო მეტს ვილაპარაკებთ, მით უფრო დიდი პატივი იქნება მათთვის. სასაცილო და სამარცხვინოა, მეტი არაფერი. მერე შეიძლება ირაკლი ღარიბაშვილი მოხსნან პრემიერ-მინისტრობიდან და გადასვან, თავმჯდომარედ ჩაუყენონ იმ პარტიას, რომლის შექმნასაც აპირებენ. ვინც დღეს არიან გასულები „ქართული ოცნებიდან“, არავინ არაფრის გამკეთებელი არ არის. არჩევნები იქნება თუ სხვა პროცესი, ხომ უნდა დაჯდე ტელევიზიაში და პოლემიკაში შეხვიდე ვიღაცასთან. რომელია მაგათგან დებატებში შემსვლელი? არც ერთი. ან რა გაუკეთებიათ, რაც პოლიტიკაში არიან? არც არაფერი. „ქართული ოცნების“ ნაკეთებით თუ აპირებენ საუბარს, მაშინ „ქართული ოცნება“ ყოფილან. თავად რა აქვთ გაკეთებული, ის თქვან. ამაზე სალაპარაკო არაფერი აქვთ, რადგან დამოუკიდებლად არაფერი გაუკეთებიათ. შექმნიან პარტიას? სასაცილოდ გაიხდიან თავს, ჯერ ისედაც დასცინის ხალხი. ის პარტია იქნება ბიძინა ივანიშვილის დაფინანსებული, „ქართული ოცნების“ სატელიტი და რასაც ივანიშვილი ეტყვის, იმას გააკეთებენ.
კომენტარები