“ლოგიკური გათვლა ჰქონდა პუტინს…” – ვახო სანაია

უკრაინა დიდი ქვეყანაა. ამხელა ტერიტორიის და ყველა ძირითადი ქალაქის ერთდროულად კონტროლი შეუძლებელია.

შესაბამისად, სრულიად ლოგიკური გათვლა ჰქონდა პუტინს პირდაპირ კიევზე შეტევა და ამ გზით წინააღმდეგობის სწრაფად დაძლევა. აშკარაა, კრემლი ფიქრობდა, რომ დედაქალაქის ელვისებური დაცემა ომს მომენტალურად დაასრულებდა, მაგრამ სამხედრო ხელმძღვანელობამ ეს მისია ვერ შეასრულა.

უკრაინის ჯარისა და ხალხის მედგარმა წინააღმდეგობამ, ქვეყნის ხელმძღანელობის გაბედულებამ და დედაქალაქში დარჩენამ, რუსეთის არმიის სერიოზულმა პრობლემებმა ოკუპანტების შეტევა მნიშვნელოვნად შეანელა.

მაგრამ პუტინის მიზანი არ შეცვლილა – კიევის აღება. დედაქალაქის ხელში ჩაგდებას სჭირდება მისი ალყაში მოქცევა. რუსეთის არმია რაც უფრო სიღრმეში მიიწევს, მით უფრო მეტი გამოწვევა აქვს – ერთიბმხრივ, უკრაინის შეიარაღებული ძალები იბრძვის; მეორე მხრივ, უკან ვერ გრძნობს ზურგს, რადგან ხალხი მის წინააღმდეგაა. ამიტომ კიევისკენ მიმავალ გზაზე უკვე ყველაფერს ანადგურებს, არც მშვიდობიან მოსახლეობას ინდობს. ხალხის ასეთ წინააღმდეგობას რუსები არ ელოდნენ. მოსკოვში ჰქონდათ ილუზია, რომ ყველაზე ოპტიმისტური ვარაუდით, რუსულ ჯარს ისე დახვდებოდნენ, როგორც გამათავისუფლებელს ან მინიმუმ მოსახლეობა უბრალოდ პასიური იქნებოდა. ყველაფერი პირიქით მოხდა.

ერთი სიტყვით, ომი გაჭიანურდა, მაგრამ რუსების მიზანი კვლავ კიევის ალყაა, რასაც ჯერჯერობით ვერ მიაღწიეს და იმედია, ვერც მიაღწევენ.

ამასობაში, სანქციები მძიმე დარტყმას აყენებს რუსეთს. დრო არ მუშაობს მოსკოვის სასარგებლოდ.

პროგნოზებს არ დავიწყებ, მაგრამ უკრაინა აუცილებლად უნდა გადარჩეს !”