“არაკომპეტენტური, ღირსებადაკარგული, მხდალი, სიშტერე… – ფატალური შეცდომაა” – როგორ აფასებს გახარია მთავრობის განცხადებებს

ყოფილი პრემიერი, გიორგი გახარია “ტვ პირველთან” ამბობს:

“ერთმნიშვნელოვნად მინდა ავღნიშნო, დღეს რაც ხდება, ეს არის მსოფლიო წესრიგის ცვლილება…

არავინ ამბობს, პირიქით, ქვეყნის მთავრობის პოლიტიკა უნდა იყოს ფრთხილი, პრაგმატული,. ამ პოლიტიკის ცენტრში უნდა იყოს საქართველოს მოქალაქე და ვერავინ უნდა შესძლოს რომ საქართველო ომში ჩაითრიოს – ამაზე ყველა ვთანხმდებით.

რას ვიღებთ და რატომ? – არაკომპეტენტური და ღირსებადაკარგული ხელისუფლება გამოგვადგა.

სიმხდალეს ამართლებენ სიფრთხილით, როდესაც არავინ, არც ერთი ქვეყანა არ ითხოვდა ჩვენგან სანქციების შეერთებას, ჩვენ ხმამაღალ განცხადებებს ვაკეთებთ. არავინ ელოდა, რომ ამ სანქციებს საქართველო უარს ეტყოდა ან შეუერთდებოდა.

როცა ვსაუბრობთ სიფრთხილეზე, ქვეყნის პირველი პირი აბრალებს ომში მყოფ ქვეყანას, რომ მათ ვერ მოახერხეს ომის თავიდან აცილება. ამის შემდეგ ამბობს, ჩვენ აქ ეკონომიკაზე ვიზრუნოთ და ომი უკრაინაშიაო – ეს ნიშნავს იმას, რომ ადამიანი ვერ ხვდება რა ზეგავლენა ექნება უკრაინის ომს.

ბრძოლაში მყოფ ხალხთან, მათ პრეზიდენტთან რომ ვერ გამონახავ შესაძლებლობას აუხსნა, რატომ არ შეგიძლია სანქციებს მიუერთდე – ეს სადღაც სიშტერეა, სადღაც მიზანმიმართული პოლიტიკა.

პრაგმატული პოლიტიკის ნაცვლად, პირველად 30-წლიან ისტორიაში, განვითარებული, დემოკრატიული მსოფლიო არის ერთ მხარეს და ჩვენ ვართ ცალკე – ეს როგორ უნდა ავუხსნათ მომავალ თაობას? როდესაც ეს ყველაფერი “პრაგმატული” პოლიტიკით აიხსნება, ეს მოტყუებაა მოქალაქეების.

ჩვენ სამეზობლოში უმიზეზოდ, უსამართლოდ იწყება ომი და მსოფლიო კონსოლიდირებულია და ჩვენ სად ვართ? მე გეტყვით სად ვართ. ჩვენ ვართ არაკომპეტენტურობაში, მხდალობაში, იქ სადაც პოლიტიკური რესურსი აღარ არსებობს, აშკარად ნათელია როგორ აზიანებს ჩვენ მომავალს. ვხედავთ, რომ ჩვენი ქვეყნის უსაფრთხოება დგება კითხვის ნიშნის ქვეშ ამ გაუაზრებელი განცხადებებით. უსაფრთხოების მთავარი საყრდენი საერთაშორისო პარტნიორებთან თანამშრომლობაა, რომელსაც დღეს ხელისუფლება ანგრევს. უნდა გვესმოდეს, ქვეყნის დაცვის საფარქვეშ, ქვეყნის უსაფრთხოება შიშვლდება. მარტივი არჩევანი გვაქვს – ან უნდა იყო განვითარებულ, თავისუფალ სამყაროსთან ან უნდა დაბრუნდე რუსულ სამჭოთა კავშირში და ეს ის საბჭოთა კავშირი არ იქნება, რომელიც ჩვენ მშობლებს ახსოვთ, ეს სულ სხვა საბჭოთა კავშირი იქნება.

ემოციები ბევრია, პოლიტიკური ფასი უნდა გადაიხადოს ყველამ, ვინც ზიანს აყენებს ქვეყნის მომავალს, ჩემი შვილის მომავალზეა საუბარი. მინდა ვუთხრა ხელისუფლებას, პრემიერ-მინისტრს, როცა ვიღაცა სადღაც დაკეტილ ოთახებში წყვეტს, ვის უნდა მიუერთდეს, ვის არ უნდა მიუერთდეს, შეთქმულების თეორიებზე იყო მინიშნებები… ამ ქვეყნის ეროვნული მომავალი არ განუსაზღვრავს არც გახარიას, არც ღარიბაშვილის, წინაპრების სისხლითაა მოტანილი. არავის აქვს იმის უფლება, სადღაც ოთახში გადაწყვიტოს როგორ წარმოუდგენია ქვეყნის მომავალი.

ეს არის ხელისუფლების ფატალური შეცდომა.”