ექიმი, მისისიპის უნივერსიტეტის პროფესორი ზურაბ გურული:
“რა მოხდება ყაზახეთში, უკრაინაში; რას მოიმოქმედებს რუსეთი; როგორი იქნება დასავლეთის რეაქცია და რატომ?…
რაც ყოფილა, იგივე იქნება და რაც მომხდარა, იგივე მოხდება; არაფერია მზის ქვეშ ახალი.” (ეკლესიასტე, 1:2-9)
ასეა. და იმიტომ არის ასე, რომ უცვლელია ადამიანის ბუნება და აზროვნების თავისებურებები.
“რუსეთი უზარმაზარი ქვეყანაა, რომელიც განიცდის დიდ შინაგან, ფსიქოლოგიურ ტრავმას ახალი რეალობის გააზრების პროცესში. რუსეთმა აუცილებლად უნდა იგრძნოს, რომ იგი რჩება მნიშვნელოვან მოთამაშედ. ჩვენ ცხადია მოვიგებთ ახალ ცივ ომსაც, მაგრამ კრებითი ამერიკელი სახელმწიფო მოღვაწე კარგად უნდა აცნობიერებდეს საკუთარი ინტერესების გავრცელების საზღვრებს”
( ჰენრი კისინჯერი )
————-
ამერიკის ისტორიაში პირველად, ცენტრალური სადაზვერვო სააგენტოს დირექტორი გახდა პროფესიონალი დიპლომატი უილიამ ბარნსი. რატომ არ ნიშნავდნენ პროფესიონალ დიპლომატს მზვერავთა შეფად?
ამაზე თავად მისტერ ბარნსმა უპასუხა თავის ლექციაში სტენფორდის უნივერსიტეტის სტუდენტებთან შეხვედრისას:
“მე ხშირად ვეუბნები ჩემს თეთრ სახლელ კოლეგებს საგანგებო სიტუაციათა ოთახში თათბირისას, რომ წიხლი გამკრან მაგიდის ქვეშ, როდესაც გადამწყვეტ მომენტებში დიპლომატიურად გავუბერავ”.
უილიამ ბარნსი ამერიკის ელჩი იყო რუსეთში. იგი თავისი პოლიტიკური მსოფლმხედველობით კისინჯერის სკოლას აკუთვნებს საკუთარ თავს.
“პრეზიდენტმა ბაიდენმა მისტერ ბარნსს უპრეცედენტო მისია დააკისრა: წაშალოს მკვეთრი საზღვრები დიპლომატიასა და დაზვერვას შორის” – ამაყად აღნიშნა თეთრი სახლის პრესსპიკერმა.
ცენტრალური სადაზვერვო სააგენტოს დირექტორს ჰქონდა დავალებული ავღანეთიდან ამერიკის გამოსვლის ორგანიზება და თალიბანთან მოლაპარაკება. მასვე აქვს დავალებული რუსეთსა და უკრაინას შორის მიმდინარე კონფლიქტის ესკალაციის კონტროლიც …
უილიამ ბარნსს არაერთხელ შეხვედრიან პირადად პუტინი და ლავროვი, რუსეთის დაზვერვისა და კონტრდაზვერვის შეფები. მისი აზროვნებისა და მოქმედების დეტალები გათვლილია; მითუმეტეს, რომ მისტერ ბარნსს ამჟამადაც სჭირდება წიხლი მაგიდის ქვეშ იმის შესახსენებლად, რომ მზვერავების შეფია და არა დიპლომატების.
ეს გახლავთ მშრალი ფაქტების მოკლე დაიჯესტი. საკმარისია ელემენტარული დედუქცია და შესაძლებელი გახდება მიმდინარე პოლიტიკური მოვლენების ლოგიკური გათვლაც და წინასწარმეტყველებაც.
ეს ბევრად უფრო ადვილია თავისუფლად მოაზროვნე ადამიანისათვის, ვიდრე სხვადასხვა მიზეზის გამო პოლიტიკურად ინდოქტრინირებულთათვის.
ამ ფაქტების საფუძველზე ასევე ადვილად შეიძლება იმ საერთაშორისო პოლიტიკური კონტექსტის გააზრებაც, რომელიც განსაზღვრავს ქართულ პოლიტიკურ რეალობასაც.
სცადეთ, გაიაზრეთ, დაფიქრდით …”
კომენტარები