კორონავირუსის ახალი ვარიანტის გამო, საფრანგეთი შეზღუდვებს ანახლებს. ოფიციალური ინფიცირებით, საშუალო დღიური მაჩვენებელი ყოველ 100 000 მოსახლეზე ახლა საფრანგეთში 700-ს შეადგენს. ეს პანდემიის დაწყებიდან დღემდე ყველაზე მაღალი მონაცემია.
შემდეგი 3 კვირის განმავლობაში, შენობებში გამართული მასობრივი ღონისძიებების ლიმიტად 2 000 ადამიანი განისაზღვრა. ღია სივრცეში კი ლიმიტი 5 000-ს შეადგენს. ორივე შემთხვევაში უნდა იყოს დაცული დისტანცია.
აიკრძალა ჭამა და დალევა საზოგადოებრივ ტრანსპორტში, მათ შორის – გრძელ დისტანციაზე მოძრავ ტრანსპორტში, კინოთეატრებში, თუ ბევრ სხვა საჯარო დაწესებულებაში. ბარებში კლიენტების დგომა აღარ დაიშვება, ყველა უნდა იჯდეს განსაზღვრულ ადგილზე. დახურულ შენობებში და საზოგადოებრივ ტრანსპორტში ისევ ნიღბებს ითხოვენ.
თუმცა, მთავრობის განცხადებით, ქუჩაში გვიან ღამით გასვლაზე საათობრივი შეზღუდვა ახალი წლის დღესასწაულებზე არ დაწესდება. ამას გარდა, იანვარში სკოლებში ბავშვებიც ჩვეულებრივ დაბრუნდებიან.
ორ კვირაში საჯარო ადგილებში შესასვლელად უარყოფითი ტესტი საკმარისი აღარ იქნება, მთავრობა ყველგან ვაქცინაციის მოწმობას მოითხოვს. ეს უკანასკნელი რეგულაცია ძალაში 15 იანვრიდან შევა, მას შემდეგ რაც გეგმას საფრანგეთის პარლამენტი დაამტკიცებს.
წყარო – ამერიკის ხმა
კომენტარები