დაავადებათა კონტროლის ეროვნული ცენტრის დირექტორი, ამირან გამყრელიძე ამბობს, რომ ქვეყანაში კორონავირუსის ახალი შტამი “ომიკრონი” ჯერ არ დაფიქსირებულა.
მისივე თქმით, სავარაუდოდ, მალე ქვეყანაში ჩამოიტანენ ისეთ PCR ტესტებს, რომლებიც დაადგენს პაციენტს აქვს თუ არა კონკრეტულად ეს შტამი.
“კონტაქტი გვაქვს ორ ძირითად პარტნიორთან, ეს არის ჯანმრთელობის მსოფლიო ორგანიზაციის შესაბამისი ლაბორატორიული სამსახური, ბუნდესვერის ინსტიტუტის მიკრო-ბიოლოგიიის ინსტიტიუტი, რომლებიც ვფიქრობ, რომ მალე მოგვაწვდიან შესაბამის PCR ტესტებს”, – თქვა ამირან გამყრელიძემ.
ამასთან, NCDC-ს ხელმძღვანელმა განმარტა, რა იციან ამ დროისთვის “ომიკრონის” შტამზე:
“ჯერ უნდა დავიცადოთ, 2-3 კვირის განმავლობაში, არ ვიცით რამდენიმე მთავარი. ვიცით ის, რომ ის უფრო ადვილად ვრცელდება და სწრაფად, განსაკუთრებით, 40-წლამდე მოსახლეობაში. არ ვიცით, ის არის მეტად აგრესიული და მეტად ვირულენტული, ვიდრე ან დელტა ან სხვა შტამი, ჯერ ეს არ ვიცით. ანუ რამდენად უფრო მძიმე მიმდინარეობას იწვევს და რამდენად უფრო აგრესიულია, სიკვდილიანობა მეტია თუ არა, ამას სჭირდება დაკვირვება”, – თქვა ამირან გამყრელიძემ.
მანვე აღნიშნა, რომ NCDC-მ უკვე დაუგზავნა პროტოკოლი ყველა ლაბორატორიას, რა შემთხვევაში შეიძლება ეჭვი მიიტანონ “ომიკრონზე” და ნიმუშები სეკვენირების ჩასატარებლად ლუგარის ლაბორატორიაში გადაგზავნონ.
როგორც ამირან გამყრელიძე ამბობს, ჯერ არ ვიცით ახალი შტამი უფრო აგრესიულია, თუ არა, უფრო ვირულენტულია, თუ არა, უფრო მძიმე მდგომარეობას იწვევს, თუ არა, სიკვდილიანობა უფრო მეტია, თუ არა, თუმცა, როგორც ჩანს, სიმპტომების შესახებ მაინც ვფლობთ რაღაც ტიპის ინფორმაციას, რადგან როგორც ასევე ამირან გამყრელიძე ამბობს, მან უკვე გადაუგზავნა ყველა ლაბორატორიას ინფორმაცია, რა შემთხვევაში უნდა მიიტანონ ეჭვი ახალ შტამზე. რასაკვირველია, მოქალაქეებს გაუჩნდებათ კითხვა, თუ არ გვაქვს პისიარ ტესტები, რომლებიც ახალ შტამს გამოავლენენ, მაშინ საიდან ვიცით, რომ ახალი შტამი ქვეყანაში არ შემოსულა? ამირან გამყრელიძის განმარტებით, შერჩევის მეთოდით, ნიმუშები იგზავნება ლუგარის ლაბორატორიაში და იქ სეკვენირებით ხდება შტამზე შემოწმება.
კომენტარები