“დღეს პაციენტი დამხვდა გაბრაზებული… ყველას ვთხოვე – ორი კვირა დამაცადონ, რომ დავაყენო ფეხზე” – ექიმი ელენე გიორგაძე

მიხეილ სააკაშვილის ჯანმრთელობის მონიტორინგის მიზნით შექმნილი სახელმწიფო კონსილიუმის წევრმა, ექიმმა ენდოკრინოლოგმა ელენე გიორგაძემ განაცხადა:

„პოსტშიმშილის პროცესი 90% გვაქვს უკვე გავლილი, გავიარეთ მშვიდად, ყველანაირი ექსცესების გარეშე, ამიტომაც მიდიოდა შემოწმება ყოველდღე ყველაფრის და ამდენი დარგის სპეციალისტის ერთდროულად მუშაობა. მე მჭირდებოდნენ ეს სპეციალისტები იმისთვის, რომ არ ჰქონოდა ორგანიზმს რაიმე სახის გართულება.

დღეს ჩემი პაციენტი მე დამხვდა გაბრაზებული და აფორიაქებული, მაგრამ მე არ ვიცი რატომ. პაციენტს, რომელსაც ანერვიულებენ არ ვიცი ტელევიზორით თუ რით, ბუნებრივია, როგორც ექიმი, ამაზე ვბრაზდები. მე ყველას ვთხოვე – მის იურისტებს, ამხანაგებსაც, ოჯახის წევრებსაც, რომ ორი კვირა დამაცადონ, რომ ეს ადამიანი დავაყენო ფეხზე. თუ ამ ადამიანზე მართლა ზრუნავთ და ზრუნავთ მის სიცოცხლეზე, ცოტა დრო, ორი კვირა მოგვეცით ექიმებს, რომ გამოვიყვანოთ ბოლომდე ამ მდგომარეობიდან.

თვითონ პაციენტი არაჩვეულებრივად მოგვყვება ექიმებს. ჩვენც ვთხოვეთ, რომ სამ ვიზიტორზე მეტი დღეში არ იყოს და რომელი ვიზიტორი იქნება და ვინ შევა მასთან, ეს უკვე ექიმის გადასაწყვეტი არ არის. როდესაც რომელიმე ვიზიტორი შედის და მასთან ხანგრძლივად რჩება, მერე, ადამიანი, რომელიც შიმშილიდან გამოდის და ახლა იწყებს ადეკვატურ და ნორმალურ კვებას, იღლება, რამე არის გასაკვირი ამაში?! ანალიზები სწორდება ნელნელა. დღესაც, ორი პარამეტრი ისე გამოსწორდა, რომ გარკვეული პრეპარატი, რომელსაც ვაძლევდით, უკვე ვხსნით. ყველაფერი სწორდება ადეკვატურად“

წყარო – ინერპრესნიუსი