ეკა ხერხეულიძემ გლდანის ციხე ამ წუთებში დატოვა, ციხეში, მიხეილ სააკაშვილთან რჩებიან ნიკა გვარამია და უკრაინის კონსული, რომლებთანაც, ხერხეულიძის თქმით, სააკაშვილს ერთი ტექნიკური საკითხი აქვს შესათანხმებელი.
ეკა ხერხეულიძე:
“მიხეილ სააკაშვილის არჩევანი არ ყოფილა საქართველოში რომელიმე ჰოსპიტალში მოხვედრა, მას სურდა სამართლიანი არჩევნების ჩატარება, რაც მოხდა და სად მოხვდა იცით. ის განიცდის იმ ადამიანების მდგომარეობას, რომლებიც მის შიმშილობას შეუერთდნენ, განსაკუთრებით ელენეს მდგომარეობას, რომელიც უკვე 17 დღეა შიმშილობს, გარდა ამისა, მას სურს დააკმაყოფილოს იმ ხალხის მოთხოვნა, რომლებიც ახლა დგანან გარეთ და ითხოვენ მის გადაყვანას კლინიკაში.
ერთადერთი რაც შეიძლება იყოს შემაფერხებელი კლინიკაში გადაყვანის, არის შემდეგი – მას აქვს ერთი პირობა, რომლის გასაცნობად დაიბარა ადვოკატი, ნიკა გვარამია და უკრაინის კონსული, მათთან ერთად გაივლიან ამ ტექნიკურ დეტალს და შემდეგ ნიკა გვარამია მოგახსენებთ მის გადაწყვეტილებას.
სააკაშვილს არ აქვს წინააღმდეგობა გორის ჰოსპიტალთან დაკავშირებით, არა იმიტომ რომ მოხარულია ამ ლოკაციით, მისთვის არანაირი მნიშვნელობა არა აქვს, სად გადაიყვანენ, მისთვის მნიშვნელობა აქვს, ბრძოლა როგორ გაგრძელდება საქართველოში. ის ტექნიკური დეტალი, რომელიც ახლა მისთვის მნიშვნელოვანია, ამ მომენტში წყდება იქ.
ეს არ არის რეანიმაცია, ეს არის საკანი, გადაკეთებული, სადაც დგას 2 საწოლი და წვეთოვანი. შემთხვევითობამ გადაარჩინა ეს ადამიანი. ქალბატონი გულიკო, რეანიმატოლოგი, აქ მოსული იყო ნიკოლოზ ყიფიანის თხოვნით და სწორედ, მისი დახმარებით მოხდა სააკაშვილის გადარჩენა გუშინ. მიხეილ სააკაშვილის ოჯახი და ჩვენ ვართ მადლიერნი ქალბატონი გულიკოს.
ყოველგვარი ჭორი, რომ კიდევ ერთი პრეტენზია აქვს სააკაშვილს, უსაფუძვლოა, ეს პირობა ეხება ტრანსპორტირებას.”
კომენტარები