პარლამენტის ჯანდაცვის კომიტეტის თავმჯდომარე, დიმიტრი ხუნდაძე, რომელიც გლდანის ციხეში იმყოფებოდა, პარლამენტში გამართულ საგანგებო ბრიფინგზე, ამბობს:
“მდგომარეობა დასტაბილურებულია, თუმცა, შევთანხმდით, რომ საჭიროებს დამატებით კონსულტაციებს, შევთანხმდით, რომ ყველა ლაბორატორიულ კვლევაზე არ უნდა ითქვას უარი, შეფასდება, რისი გაკეთება იქნება შესაძლებელი ადგილზე, რისი გაკეთება იქნება შესაძლებელი რესურსის დამატების ხარჯზე, მაგრამ თუ საჭირო იქნება სხვა კლინიკაში გადაყვანა, არც ამაზე ვიტყვით უარს…
უნდა დაგვეხმარონ მიხეილ სააკაშვილის მომხრეები, რომელთა ნაწილი თავისი შეძახილებით ახალისებს, რომ მან არ შეწყვიტოს შიმშილობა, შესაძლოა, ზოგის პირად ინტერესში შედის ვითარების კიდევ მეტად დამძიმება. აქვე ვიტყვი, ყველაზე მეტად, დღეს, ჩვენ ინტერესშია, რომ მისი სიცოცხლე, ჯანმრთელობა იქნეს შენარჩუნებული, არ დავუშვებთ როგორც მის მიმართ მძიმე შედეგის დადგომას, არ დავუშვებთ არეულობის შემოტანას, რომელიც იკვეთება ოპოზიციონერთა შეძახილებში, ახალისებენ მის შიმშილობას.”
დიმიტრი ხუნდაძემ თქვა, რომ მიხეილ სააკაშვილის ციხის საავადმყოფოში დარჩენა, თუ სამოქალაქო კლინიკაში გადაყვანა – არც ერთი გამორიცხული არ არის.
არ მინახავს სააკაშვილი და გეტყვით მიზეზსაც, როცა ციხეში მივედი, სააკაშვილი ახალ გამოსული იყო კომატოზური მდგომარეობიდან, ეს არის საყურადღებო, მაგრამ არა კატასტროფული და ჩვენი შესვლა შეიძლებოდა მისთვის დაძაბულობის მიზეზი გამხდარიყო. ჩვენთვის საკმარისი იყო ლაბორატორიული მონაცემების გაცნობა და ექიმებთან გასაუბრება. შესაძლოა მისი საყურადღებო მდგომარეობა, თუ არ შეწყვეტს შიმშილობას, კიდევ უფრო მაღალ ხარისხშია ავიდეს და რისკები იზრდება, მაგრამ ჩვენი ყველა ქმედება იქნება მხოლოდ და მხოლოდ მისი ჯანმრთელობის საჭიროებიდან გამომდინარე.
კომენტარები