უშიშროების ყოფილი მინისტრი, ვალერიან ხაბურძანია, ჟურნალ “თბილისელებთან” ამბობს:
პოლიტიკაში ძალიან დიდი მნიშვნელობა აქვს იღბალსაც და შევარდნაძე შეიძლება ითქვას, საკმაოდ იღბლიანი პოლიტიკოსი იყო იმითაც, რომ მოესწრო თავისი პირადი ოპონენტის დაცემას. ვერ დავარქმევ მტერს, ვინაიდან სააკაშვილი იყო შევარდნაძის პირადი სასჯელი, ვინაიდან თვითონაც ქმნიდა მას და თავისსავე ქმნილებამ გამოუყვანა წირვა. მაშინ საპარლამენტო მდივანი ვიყავი და ჩემი ტელეფონით ხდებოდა ეს პროცესები. რა თქმა უნდა, ჟვანიამაც გარკვეული როლი შეასრულა, მაგრამ ის მეტად მშვიდი და სისხლის ნაკლებად მოყვარული კაცი იყო, ვიდრე სააკაშვილი, მათი შედარებაც არ შეიძლება. ჟვანიამ დაიწყო ეს პროცესი და, საერთოდაც, ჟვანიამ მოიყვანა სააკაშვილი. სწორედ ჟვანიას მეშვეობით გახდა სააკაშვილი დეპუტატი 1995 წლის მოწვევის პარლამენტში და იურიდიული კომიტეტის თავმჯდომარეც.
შევარდნაძე ნიჭიერი კაცი იყო და მისი ნიჭიერება იმ პერიოდის პოლიტიკაში დაფასდა, თუმცა არ ვიცი, დღეს რამდენად ივარგებდა მისი ნიჭი. დღეს სახურავზე მორბენალი სააკაშვილის დროა.
წარმოიდგინეთ, შევარდნაძეს რომ სახურავზე ერბინა და კონტეინერით შესულიყო, მაგალითად, სოხუმში, ასეთ შევარდნაძეს ვინმე დაელაპარაკებოდა მის გარშემო?! დღეს ასეთ სააკაშვილს ციხესთან ელის 5 000 კაცი და ხმას აძლევს 500 000.
სააკაშვილს თავისი დრო დაუდგა. დღეს მისი ტიპის ფიგურების დროა, პოპულიზმის, სიშლეგის. რა თქმა უნდა, ისიც ნიჭიერი კაცია, იცის ენები და ადამიანების დათრგუნვა. მე, მაგალითად, მახსოვს მისგან დათრგუნული ადეიშვილი და სულაქველიძე, საოლქო სასამართლოს თავმჯდომარე. ადეიშვილი რომ წარადგინა ჩვენთან სამინისტროში, მასზე თქვა, ეს არის უბოროტესი არსებაო. სააკაშვილს გაუმართლა, რომ გარშემო ისეთი ადამიანები ხვდებოდა, რომლებიც „ჩმორდებოდნენ“. მას ძალიან უყვარდა ტერმინი „ჩმორი“, იცით, რომ „ჩმო“ რუსული აბრევიატურაა: „ჩელოვეკ მორალნო ობნაჟონნიი“. სააკაშვილის ლექსიკაა, „დაჩმორება“, „გაბანძება“. „აჩმორებდა“ ხალხს.
მისი გარემოცვა სარგებლობდა სააკაშვილის ენერგეტიკით. ვერავინ იტყვის, რომ ვანო მერაბიშვილს ძლიერი ენერგეტიკა აქვს, მაგრამ სარგებლობდა სააკაშვილის ენერგეტიკით. ადეიშვილი ცოტა სხვანაირად იქცეოდა, ბერიობა უნდოდა, თუმცა ვერ გამოუვიდა.”
სრულად – თბილისელები
კომენტარები