საქართველოს ახალგაზრდა იურისტთა ასოციაციის ინფორმაციით, 2 ოქტომბერს, არჩევნების დღეს პარლამენტის თავმჯდომარის, კახა კუჭავას მიერ აგიტაციის წესის დარღვევის გამო სასამართლომ მას ჯარიმა არ დააკისრა და მხოლოდ სიტყვიერი შენიშვნა გამოუცხადა. აგიტაციის წესის დარღვევა 2 000 ლარით დაჯარიმებას ითვალისწინებს.
დამტკიცდა, რომ კუჭავამ აგიტაციის წესი დაარღვია და ის მაინც არ დააჯარიმეს!
საია უარყოფითად აფასებს სასამართლოს გადაწყვეტილებას და მიიჩნევს, რომ ამგვარი ლოიალური მიდგომა პარლამენტის თავმჯდომარის მხრიდან ჩადენილ აშკარა სამართალდარღვევაზე, უარყოფითად აისახება საარჩევნო სამართალდარღვევების პრევენციაზე.
2 ოქტომბერს პარლამენტის თავმჯდომარე კახა კუჭავა არჩევნებზე მივიდა პირბადით, რომელზეც ქართული ოცნების სიმბოლიკა იყო გამოსახული.ფაქტი დაგმო და აგიტაციად შეაფასა არასამთავრობო ორგანიზაცია სამართლიანმა არჩევნებმაც (ISFED).
“ალია” შეგახსენებთ იმასაც, რომ როცა ქუჩაში, სხვადასხვა წესის დარღვევის გამო გვაჩერებს პოლიცია, მასაც აქვს საშუალება, დაჯარიმების ნაცვლად სიტყვიერი გაფრთხილებით შემოიფარგლოს, მაგრამ, როგორც წესი, ასე არ იქცევა. ცოტა ხნის წინ, მაგალითად, 17 წლის მოზარდი დააჯარიმეს, მოზარდი, რომელიც აქამდე არასოდეს ყოფილა დაჯარიმებული და პირველი შემთხვევის გამო, შეეძლოთ, გაფრთხილებით შემოფარგლულიყვნენ. იგი დააჯარიმეს იმ დროს, როცა პარკში პირბადე მოიხსნა.
რატომ არის მოქალაქის “ჯარიმა” ჯარიმა და რატომ არ აისახება კუჭავას “ჯარიმა” მის ჯიბეზე? მოქალაქეებზე ნაკლები აქვს შემოსავალი? მოქალაქეებზე ნაკლები აქვს პასუხისმგებლობა?
კომენტარები