აშშ-ის სახელმწიფო მდივნის მოადგილის მოვალეობის შემსრულებლის ფილიპ რიკერის განცხადებით, ბაქოსა და ერევანში ვიზიტის შემდეგ ის კვლავ საქართველოში ჩამოვა.
“ამ პრესკონფერენციის შემდეგ, მე გავაგრძელებ შეხვედრებს საქართველოში. შემდეგ გავემგზავრები ბაქოსა და ერევანში, იქიდან კი კვლავ, უკან, საქართველოში დავბრუნდები, გარკვეული პერიოდით.
მნიშვნელოვანია, ჩვენი თანამშრომლობა COVID-ის კუთხით, მოგეხსენებათ ამ ბრძოლაში, რომ ამერიკა მხარში უდგას საქართველოს. გაიგეთ ალბათ, რომ ვაქცინით მოხდება საქართველოს დახმარება. საქართველო იქნება პირველი იმ ქვეყნებში, ვინც მიიღებს გამოყოფილი COVID ვაქცინის 25 მილიონი დოზიდან გარკვეულ რაოდენობას” – ამბობს რიკერი პრესკონფერენციაზე.
მან ყურადღება გაამახვილა ამერიკისა და საქართველოს სტრატეგიულ პარტნიორობაზეც:
“მოგეხსენებათ, ბაიდენის ადმინისტრაციისთვის, საქართველო რჩება მთავარ სტრატეგიულ პარტნიორად სამხრეთ კავკასიაში და ძალიან მნიშვნელოვან პარტნიორად შავი ზღვის რეგიონში და მე ნამდვილად, ძალიან მოხარული ვარ, რომ მაქვს ასეთი პირისპირი შეხვედრების შესაძლებლობა აქ, საქართველოში. მიუხედავად იმისა, რომ ნიღბის ტარება გვიწევს, ამ მნიშვნელოვან და დინამიურ დროს საქართველოსთვის”.
მან მედიაზეც ისაუბრა:
“დღევანდელი ჩემი შეხვედრები დაიწყო მედიაწარმომადგენლებთან, ასევე ორგანიზაციებთან, რომლებიც მუშაობენ ამ სფეროში. რადგანაც ჩვენ ვსაუბრობთ ყოველთვის დემოკრატიული ინსტიტუტების გაძლიერებაზე და თავისუფალი მედია გახლავთ ერთ-ერთი უმნიშვნელოვანესი ინსტიტუტი. ჟურნალისტებმა უნდა შეასრულონ საკუთარი საქმიანობა მიუკერძოებლად და დასვან შეკითხვები, ხოლო მთავრობის მოვალეობაა, პასუხი გასცენ ამ კითხვებს. მოგეხსენებათ, ბაიდენ-ჰარისის ადმინისტრაცია ადამიანის უფლებებს ანიჭებს ძალიან დიდ მნიშვნელობას და არის მათთვის პრიორიტეტი საგარეო პოლიტიკისა. რა თქმა უნდა, ამაში მოიაზრება თავისუფალი პრესა, მოსაზრება, გამოთქმა თავისუფლად, რადგანაც მედია გახლავთ დემოკრატიის ქვაკუთხედი. შესაბამისად, ჩვენ აუცილებლად გავაგრძელებთ ამ საკითხზე ყურადღების გამახვილებას. ასევე მნიშვნელოვანია, პასუხისმგებლიანი დამოკიდებულება”
რიკერმა კომენტარი სასამართლო სისტემის რეფორმაზეც გააკეთა:
“საქართველოს დემოკრატიულმა ინსტიტუტებმა აღიარების დღიდან მიაღწიეს საკმაოდ დიდ პროგრესს, თუმცა, კვლავ ბევრია გასაკეთებელი. რა თქმა უნდა, სასამართლო სისტემის რეფორმა არის ძალიან მნიშვნელოვანი და ამას იმსახურებს ქართველი ხალხი. ყველა საკითხი უნდა გაითვალისწინონ, როგორიცაა მოსამართლეთა არჩევა, მათი დაწინაურება, სადისციპლინო საკითხები და ა.შ. ყველაფერი ეს რეფორმით უნდა გადაიჭრას. 19 აპრილის შეთანხმება იყო წინ გადადგმული ნაბიჯი ამ კუთხით, ეს ნიშნავს, რომ ამ რეფორმებზე მუშაობა უნდა გაგრძელდეს და რაც ყველაზე მთავარია, ეს პროცესი უნდა იყოს ინკლუზიური… ყველამ უდნა გაითვალისწინოს ის, რომ სასამართლოს დამოუკიდებლობა და კანონის უზენაესობა უმნიშვნელოვანესია ევროატლანტიკური ინტეგრაციისა და ქვეყნის განვითარებისთვის, იმისთვის, რომ იყო ინვესტიციები და სხვა”.
ამერიკის სახელმწიფო მდივნის მოადგილის მოვალეობის შემსრულებელი დღეს უკვე შეხვდა მედია ადვოკატირების ჯგუფების წარმომადგენლებს, არასამთავრობოებს, პრემიერ ღარიბაშვილს.
დღის ბოლოს კი ის ოპოზიციური პარტიის ლიდერებს შეხვდება.
კომენტარები