ნაციონალური მოძრაობის თავმჯდომარე, ნიკა მელია, ტელეკომპანია “ფორმულასთან” პასუხობს ჟურნალისტ გიორგი თარგამაძის კითხვებს და 14 ოქტომბრის აქციაზე საუბრისას, ამბობს, რომ მათგან, ვინც 14 ოქტომბერს ქუჩაში გამოსული ხალხის დაშლაში ადანაშაულებენ, არ მოუსმენია ალტერნატივა, რას გააკეთებდნენ მის ადგილას.
ნიკა მელია:
-დღემდე მოგისმენიათ რომელიმესგან, რას გააკეთებდნენ ჩემ ადგილას 14 ოქტომბერს? არა, არ არსებობს, მათ არ ჰქონიათ არც გეგმა, არც სურვილი, არც წინააღმდეგობა.
გიორგი თარგამაძე:
-ბატონი მუმლაძისგან მომისმენია, მას უთქვამს რომ ეს ხალხი არ უნდა დაშლილიყო, რომ უნდა დაწყებულიყო აქტიური პიკეტირება და სხვა შემაწუხებელი აქციები და ივანიშვილი იძულებული გაეხადათ მიეღო გადაწყვეტილება.
ნიკა მელია:
-არამერტო ეს ბატონი, მეორე კანდიდატიც ბევრჯერ ახსენებს, რომ მისი თავმჯდომარეობის შემთხვევაში ხალხს აღმა-დაღმა აღარ წაიყვანს და აღარ დაშლის. დიდი გამოცდილება დამიგროვდა საპროტესტო აქციების ორგანიზების. მაქვს გაცილებით მეტი პასუხისმგებლობა. მე როდესაც ვგრძნობდი, რისკის გაწევა იყო გამართლებული, ვინაიდან ვხედავდი წარმატების შანსს ვერაგი მტრის წინააღმდეგ, 2019 წლის 20 ივნისს შესაბამისად მოვიქეცი და საკუთარი რისკის ფასად და ძალიან ბევრი ადამიანის ჯანმრთელობის რისკის ფასადაც მივიღე ის გადაწყვეტილება, რაც არ იყო ადვილი, ის პოლიტიკური განცხადება მაქვს მხედველეობაში, რომელიც მე გავაკეთე. 14 ოქტომბერს სხვა რეალობა იყო და არ ვნანობ იმას, რაც მე გავაკეთე და თუ ვინმეს წარმოუდგენია, რომ 14 ოქტომბერს ჩემ ადგილზე ყოფნისას, ხალხს დაძრავდა საზარბაზნე ხორცად რომელიმე ადმინისტრაციული შენობის მიმართულებით და იქ ის წარმატებას მიაღწევდა, დარწმუნებული ვარ, ამ შეცდომას არ დავუშვებდით და არ დავუშვით, თუ ჩვენ ამ შეცდომას დავუშვებდით, დღეს ის თეორიული შანსი, მიხეილ სააკაშვილის ჰუმანიტარული მისიით გადაყვანის, დაკარგული იქნებოდა. მე ამ პასუხისმგებლობას არ გავურბივარ, უბრალოდ, მიკვირს, რატომ გაახსენდათ ეს ამ ადამიანებს 9 ნოემბერს? ადამიანებს, რომლებიც პარტიულ თანამდებობებზე არიან, მოქმედი პარლამენტის წევრები არიან.
კომენტარები