2026 წლის პირველ ექვს თვეში ჯარიმებიდან და სანქციებიდან ბიუჯეტში შესული თანხა წლიურად 70.4%-ით (თითქმის 123 მლნ ლარით) გაიზარდა, ამასთან, მხოლოდ საგზაო მოძრაობის წესების დარღვევებზე გამოწერილი ჯარიმებიდან კი 54%-ით (თითქმის 52 მლნ ლარით). ამის შესახებ ინფორმაციას bpn.ge ავრცელებს.
გამოცემის ცნობით, საქართველოს ნაერთი ბიუჯეტის შემოსულობების (კონსოლიდაციის გარეშე) მიხედვით, წელს 6 თვეში სანქციებიდან, საურავებიდან და ჯარიმებიდან მიღებულმა შემოსავალმა 297 567 586 ლარი შეადგინა, მაშინ, როცა 2025 წლის იანვარ-ივნისში ეს მაჩვენებელი 174 588 123 ლარი იყო.
მონაცემების მიხედვით, 2026 წლის 6 თვეში ბიუჯეტში შესული 297 მლნ ლარიდან 242.140 მლნ ლარზე მეტი ადმინისტრაციულ სამართალდარღვევებზე გამოწერილ ჯარიმებზე მოდის. შედარებისთვის, წინა წლის იგივე პერიოდში ამავე მუხლით, ბიუჯეტში 140.305 მლნ ლარი შევიდა.
ამასთან, გაზრდილია ზოგადად საგზაო მოძრაობის წესების დარღვევისთვის ბიუჯეტში შესული თანხის მოცულობაც. კერძოდ, ფინანსთა სამინისტროს მონაცემებით, წელს იანვარ-ივნისში საგზაო მოძრაობის წესების დარღვევისთვის გამოწერილი ჯარიმებიდან ხაზინაში 148 407 262 ლარი შევიდა, 2025 წლის იგივე პერიოდში – 96 431 599 ლარი.
კომენტარები