პოლიტოლოგი, ხათუნა ლაგაზიძე:
“უკრაინა დასავლური ცივილიზაციის ახალ ისტორიას წერს. ვფიქრობ, დროულია დავიწყოთ ანალიზი იმ ტენდენციების და არა მარტო გამოწვევების, არამედ – შესაძლებლობების, რომელსაც მომავალ მსოფლიოში უკრაინელების მიერ გაღებული კარიბჭე აჩენს და რომელზეც მსოფლიოს წამყვანი ტვინები უკვე საუბრობენ. ამიტომ, დღეიდან შემოგთავაზებთ კომპაქტურ ანალიზებს ამ ტენდენციების და იმ გამოწვევების, რომელთა შესაძლებლობებად ქცევა შესაძლებელია.
• ზელენსკის გზა უკრაინელი ჩარლი ჩაპლინიდან თანამედროვე ჩერჩილამდე – ასე აღწერა უკრაინის პრეზიდენტის ტრანსფორმაცია და როლი ჩვენი დროის ერთ-ერთმა უდიდესმა მოაზროვნემ ნეილ ფერგიუსონმა, რომელიც აღიარებს, რომ თანამედროვე დასავლური სამყაროს კრიზისი 2008 წელს საქართველოს წინააღმდეგ რუსეთის ომის არასათანადო შეფასებით დაიწყო.
• უკრაინის ბრძოლამ რუსული მონსტრის წინააღმდეგ, რომელიც დასავლურ ცივილიზაციას განადგურებით ემუქრება, შეუძლია დაასრულოს ის შეურიგებელი წინააღმდეგობები, რომელიც დასავლეთს შიგნიდან ღრღნის და ფიტავს: ბრძოლა ნაციონალიზმსა და ლიბერალიზმს შორის, რადგან უკრაინამ აჩვენა, რომ ნაციონალიზმი არა განსხვავებული ეთნოსის წინააღმდეგ ბრძოლაა, არამედ მოყვასის, თანამოქალაქის, თანამოაზრის, თანამებრძოლის აღიარება და პატივისცემა, რაც სწორედ ლიბერალიზმის პოსტულატებია – ეს თანამედროვეობის კიდევ ერთი უდიდესი მოაზროვნე იუველ ნოა ჰარარია.
• სწორედ უკრაინამ აჩვენა, რომ “სამოქალაქო ნაციონალიზმი” არის ის, რაზეც თანამედროვე დასავლური სამყაროს მშვიდობიანი და წარმატებული განვითარება უნდა დაეფუძნოს: როცა ერთნაირი თავგანწირვით, ერთმანეთის გვერდით იბრძვის საკუთარი, უკრაინული სახელმწიფოსთვის ეთნიკურად უკრაინელი და ეთნიკურად რუსი უკრაინის მოქალაქე. ნიშანდობლივია, რომ პუტინის რუსეთი განსაკუთრებული სისასტიკით უსწორდება სწორედ იმ ქალაქებს, მაგალითად, ხარკოვს, სადაც უმეტესობა ეთნიკურად რუსი უკრაინის მოქალაქე ცხოვრობს. სწორედ იმიტომ, რომ ზუსტად “სამოქალაქო ნაციონალიზმია” ის, რითიც თანამედროვე უკრაინა ჩამყაყებული ველიკოდერჟავული იდეით დამონებული რუსეთის იმპერიის ხალხებს ამარცხებს.
• უდავოა “სამოქალაქო ნაციონალიზმის” ეფექტურობა და აღმატებულობა ეთნიკურ ნაციონალიზმზე – ეს უკვე ენ ეპლბაუმია.
• მოკლედ, თანამედროვე დასავლური სამყარო უკრაინამ ძირეული ტრანსფორმაციის აუცილებლობის წინაშე დააყენა, გააშიშვლა რა მისი სისუსტეები და შესთავაზა ახალი ღირებულებითი პარადიგმები. “ბებერ” ევროპას მორალურ საყრდენად “ახალგაზრდა” ევროპა მოევლინა უკრაინის სახით. და გადაუჭარბებლად შეიძლება ითქვას, რომ დღეს სწორედ უკრაინაშია დასავლური ცივილიზაციის ხსნა: დასავლეთი ამას ან გაიაზრებს ან დასავლური სამყაროს სწრაფი და ძალიან მტკივნეული დაისი/დაღმასვლა დაიწყება.
• ამას ადასტურებს რუსეთის მზერა ჩინეთისკენ და მისი იმედი, რომ ჩინეთი მას როგორც ეკონომიკური სანქციების დამანგრეველ ეფექტს შეუმსუბუქებს, ასევე სამხედრო დახმარებასაც აღმოუჩენს. რამდენად რეალურია რუსეთის იმედები, ეს ცალკე განხილვის თემაა, თუმცა გუშინ გავრცელდა ინფორმაცია, რომ ჩინური საინფორმაციო-ტექნოლოგიური გიგანტი “ჰუავეი” თანახმაა, რუსეთს ტექნოლოგიური დახმარება აღმოუჩინოს.
• მოკლედ, რუსეთ-ჩინეთის შესაძლო ალიანსი ან დამანგრეველი ძალის იქნება დასავლური სამყაროსთვის, თუ ჩინეთმა ამ გზით დასავლური დომინაციის დასრულების შესაძლებლობა იგრძნო და ჩათვალა, რომ სწორედ ახლაა “დრო და მომენტი” ან დასავლური სამყაროს სწრაფი და ეფექტური გამოფხიზლების და მისი ახალი რენესანსის დასაწყისი იქნება. აქ შუა არ არსებობს.
დღეისათვის სულ ეს იყო. ხვალამდე, უკეთესი მომავლის იმედით”
კომენტარები