ჟურნალისტი, არჩილ გამზარდია:
“ვიცი, უკვე გაინტერესებთ – პრეზიდენტის იმპიჩმენტი:
პრეზიდენტის იმპიჩმენტის – მისი პოსტიდან გადაყენების და უფლებამოსილების შეწყვეტის საფუძველი, საქართველოს კანონმდებლობით, შესაძლოა, გახდეს ქვეყნის კონსტიტუციის დარღვევა ან პრეზიდენტის მოქმედებებში დანაშაულის ნიშნების აღმოჩენა.
პრეზიდენტის იმპიჩმენტის საკითხი პარლამენტის წინაშე შეუძლია დააყენოს პარლამენტართა ერთ მესამედს: საქართველოს შემთხვევაში, 50 დეპუტატს.
შემდეგ, პროცესში საქართველოს საკონსტიტუციო სასამართლო ერთვება – სწორედ ის აფასებს, დაარღვია თუ არა პრეზიდენტმა კონსტიტუცია ან აქვს თუ არა საფუძველი დანაშაულს, რომელსაც მას ედავებიან.
თუ საკონსტიტუციო ამას დაადგენს, პარლამენტის სრული შემადგენლობის 2/3 – 100 დეპუტატი მიიღებს გადაწყვეტილებას პრეზიდენტის იმპიჩმენტის წესით გადაყენების შესახებ.
ამის შემდეგ კი, როდესაც პრეზიდენტს მოეხსნება ხელშეუხებლობის იმუნიტეტი, შესაძლებელია მისი სისხლის სამართლის პასუხისგებაში მიცემაც.
პრეზიდენტის გადაყენების საკითხი, შესაძლოა, დადგეს იმ შემთხვევაშიც, თუ ის კონსტიტუციას დაარღვევს, რადგან სწორედ ის არის ქვეყნის უზენაესი კანონის დაცვის მთავარი გარანტი.”
კომენტარები