ვინ უღალატა სააკაშვილს? – “მისამართს მოგწერთ სად მიიყვანოო და თბილისში არც ბინა დაგვხვდა და არც ადამიანი…”

ფოტოკოლაჟი – მთავარი არხი

ელგუჯა ცომაია, რომელის დახმარებითაც მიხეილ სააკაშვილი ქვეყანაში შემოვიდა, “ტვ პირველთან” ამბობს, რომ როცა უთხრეს, მიხეილ სააკაშვილი უნდა წამოეყვანა, 15 წამში უკვე პასუხი გასცა, რომ თანახმაა და მიუხედავად იმისა, რომ ის რამდენიმე თვე უკვე იჯდა ციხეში და 68 წლის ასაკში 6 წლიანი პატიმრობა ემუქრება, აცხადებს, რომ არ ნანობს.

“ჩემი აზრით, ფოთში უნდა დახვედროდნენ. ვიღაცას ხომ უნდა წაეყვანა. მე რომ მცოდნოდა, ვინ უნდა დახვედროდა, ვის უნდა წაეყვანა, მივაკითხავდი სახლში და ერთ–ორ გემრიელ სიტყვას ვეტყოდი.

ვერ გეტყვით, უღალატეს, თუ არ უღალატეს, ბოლოს და ბოლოს, პრეზიდნეტი, ჩემთან ხომ არ უნდა ყოფილიყო სახლში? ან რაღაც მოხდა, ან ვერ მოვიდნენ, ან არ მოვიდნენ, მე ეს კითხვა მისთვის არ დამისვამს, ეს 8 დღე ის იყო ჩემი მეგობარი, დახვდებოდნენ, არ დახვდებოდნენ, რომ ეთქვა უკან წავიყვანდი, ეთქვა, აზერბაიჯანში გადამიყვანეო, იქაც გადავიყვანდი, პრობლემა არ იქნებოდა.

მოვდივართ გზაში და დღეს თქვენთან უნდა გავჩერდეო… არ ვიცი, რატომ. სტუმარი ღვთისაა”,  – ამბობს ცომაია მედიასთან.

ტვ პირველთან, ელგუჯა ცომაია ჰყვება, რომ ბათუმში ყოფნისას, საკონტაქტო პირმა, სააკაშვილის თბილისში წამოყვანა სთხოვა, შეკვეთილში, ივანიშვილის რეზიდენციას რომ უახლოვდებოდნენ, სააკაშვილი მძღოლის გვერდით იჯდა. ამ დროს ავტომობილს პატრული აედევნა.

ელგუჯა ცომაია:

“პატრულმა რომ გაგვაჩერა, პრეზიდენტი იჯდა ჩემ გვერდით. არ ვიცი, იცნეს, არ იცნეს, ჩამაბერინეს, ჯარიმა გამომიწერეს და გამომიშვეს. შეხედა პატრულმა, ალბათ, ვერ იცნო, არ ვიცი. პატრული რომ წავიდა, შევეკითხე, ახლა თქვენ რომ ყოფილიყავით (მთავრობაში) რას იზამდით მეთქი და ორივე მინისტრს მოვხსნიდიო, უშიშროების და შს მინისტრსო. ეს იყო მაგის სიტყვები.

ერთი კითხვა დავუსვი, ძებნილი იყო, რატომ აპირებდა ჩამოსვლას, მიპასუხა, საქართველოზე ვარ შეყვარებული და საქართველო უნდა ავაყვაოო. თუ მე არ ავაყვავე საქარველო, რაც გინდა ის მითხარიო.

დაკავებას ელოდებოდა, თუ არა, არ ვიცი, ასეთ საქმეზე ვინც მოდის, დაკავებაზე ხო გფიქრობს, მეც ვფიქრობდი, ალბათ, ისიც ფიქრობდა. მე კი ვარ ცოტა მამაცი, მაგრამ ის ჩემზე ძლიერი ყოფილა. ვუთხარი, მთავარია სადმე მივიდეთ სახლში–მეთქი, გზაში, თუ ვინმემ იცის ერთად ვართ, ჩვენ ორივეს მიგვაკლავენ სადმე და დამაბრალებენ, ცომაიას ჰქონდა იარაღი ხელში, ამას გააკეთებენ–მეთქი.”

ელგუჯა ცომაია ამბობს, რომ ბათუმიდან თბილისისკენ მომავალ სააკაშვილთან კავშირზე არავინ გასულა, დუმდა მის ყველა ტელეფონი, ერთდერთი მესიჯი ხაშურთან ელგუჯა ცომაიამ მიიღო, უთხრეს მალე მისამართს ეტყოდნენ, სადაც თბილისში პრეზიდენტი უნდა მიეყვანა. 

კონსპირაციული ბინის მისამართს პრეზიდენტი ხაშურიდან თბილისამდე ელოდებოდა, თუმცა დედაქალაქში ჩამოსულმა სააკაშვილმა აღმოაჩინა, რომ არც ბინა არსებობდა და არც ადამიანი, ვინც მას დახვდებოდა. ამიტომ იძულებული გახდა ელგუჯა ცომაიასთვის ისევ სახლში დაბინავება ეთხოვა.

“ელოდებოდა რომ მას დაახვედრებდნენ სახლს თბილისში, ეს პირობა იყო. უნდა დახვედროდნენ და რომ არ დახვდნენ, იმიტომ წამოვედით სახლი, კაციშვილმა რომ არ დამირეკა, წავიყვანე სახლში. სტუმარი ღვთისაა. რაც მქონდა სახლში საჭმელი, ვჭამეთ, დავლიეთ”,  – ჰყვება ცომაია მედიასთან.

ელგუჯა ცომაია გამოძიებისთვის მიცემულ ჩვენებაში ადასტურებს, რომ მას პრეზიდენტის ტრანსპორტირება ვანო მერაბიშვილის ყოფილმა მოადგილემ, გია ლორთქიფანიძემ თხოვა. იყო თუ არა ის პასუხისმგებელი საქართველოში გადაადგილებაზე, ცომაია არ აკონკრეტებს, ამბობს, რომ გია ლორთქიფანიძესთან მას შემდეგ კომუნიკაცია არ ჰქონია, თუმცა, როდესაც საზღვრის დატოვების უფლება მიეცემა, მის ნახვას ისევ აპირებს.

მისი თქმით, იმ პერიოდში, როცა მიხეილ სააკაშვილმა დაკავებამდე ორი დღე მის საცხოვრებელ სახლში ქვიშხეთის ქუჩაზე გაატარა, მისი ბედით არავინ დაინტერესებულა. პრეზიდენტთან კონტაქტზე იმ ხალხისგან ვინც მისი მარშრუტი დაგეგმა,  არავინ გასულა.

ელგუჯა ცომაია:

“კონტაქტზე არავინ გამოვიდა, საერთოდ არავინ. სახლში რომ მივედით, არავის დაურეკავს… მათ არ იცოდნენ პრეზიდენტი სად იყო. ვიღაცამ გადაწყვიტა, ელგუჯასთვის ენდოთ ეს ამბავი. პრეზიდენტი რომ მთელი ცხოვრება ჩემ სახლში ვერ დარჩებოდა, ეს კითხვა კი გამიჩნდა, მაგრამ ალბათ, მას უნდა ვკითხოთ, როცა გამოვა, მერე მე თვითონ დავუსვამ შეკითხვას, ეს რატომ მოხდა.

გამოჯანმრთელდეს, გამოვიდეს ციხიდან და მერე რა გზა აქვს, თვითონ გადაწყვიტოს. მოღალეტეები უნდა ეძებოს და მაგი თუ ვერ მოძებნის, მე მაინც უნდა მოვძებნო. მე რომ ვყოფილიყავი მაგის ადგილას, ვიკითხავდი, ეს რატომ მოხდა. იმ 8 დღის განმავლობაში, ჩემთვის იმაზე ერთგული ადამიანი არ იყო. ისტორიაში შევალ თუ არა, მაგაზე არ მიფიქრია, ვფიქრობდი იმაზე, რაც გასაკეთებელი მქონდა. თანხა მისცესო, ეს არის სისულელე, არც უკადრებიათ, არც მაკადრებდნენ. ჩვენთან საქართველოში, ყველაფერი რომ ფულზე იზომება, მაგაზე მწყდება გული.”