პოლიტოლოგი, გია ხუხაშვილი, “პალიტრავიდეოსთან” ამბობს:
“დღეს გაგრძელდა კამათი იმაზე, ვინ არის ოლიგარქი. მოგეხსენებათ ევროკომისიის რეკომენდაციებიდან ერთ–ერთი არის დეოლიგარქიზაცია და აქედან გამომდინარე, ეს საკითხი იქცა შიდა პოლიტიკური დაპირისპირების კიდევე ერთ თემად. როგორც მიღებულია მხარეები ერთმანეთისკენ იშვერენ ხელს.
დეოლიგარქიზაციის პროცესის პერსონიფიცირება არ არის სწორი –უნდა შევთანხმდეთ პრინციპზე, ვინ შეიძლება ჩაითვალოს ოლიგარქად – ძალიან მარტივია და საღი ლოგიკაც მეტყველებს იმაზე, რომ სახელმწიფოებრივ პრობლემად მდიდარი ადამიანი იქცევა მხოლოდ იმ შემთხვევაში, თუ ის ზემოქმედებს ხელისუფლებაზე, აკონტროლებს ხელისუფლებას და ამის სანაცვლოდ ის იღებს მატერიალურ სიკეთეს – ტენდერებში იგებს, ხელისუფლების შესაბამის კომისიაზე აქვს კონტროლი, ისეთ ეკონომიკურ საქმიანობაში სადაც ხელისუფლება მონაწილეობს ან აუქციონის, ან ლიცენზიების სახით, მას აქვს ბერკეტები, კონკურენტულ ბრძოლაში სხვებთან მიაღწიოს წარმატებას, იშოვოს ფული და ამ ფულის გარკვეული ნაწილი ჩაასხას ისევ იმაში, რომ თავისი გავლენა გაზარდოს.
ოლიგარქად ჩაითვლება მხოლოდ ის ადამიანი, რომელსაც აქვს ხელისუფლებასთან ამ ტიპის ინტეგრირებული, ორმხრივი ურთიერთობები.
არგუმენტები რაც მოჰყავთ, კობახიძემ ისაუბრა, რომ ოპოზიციაში უნდა მოვიკითხოთ ოლიგარქები, ეს არის სრული აბსურდი, ოპოზიციასთან დაკავშირებულ ძალიან მდიდარ ადამიანებსაც კი არა აქვთ არანაირი ბერკეტი, რომ ხელისუფლებასთან ინტეგრირებული, უკანონო ურთიერთობების სისტემები შექმნას, შეიძლება დღეს ოპოზიციაში მყოფი და გუშინდელ ხელისუფლებასთან ინტეგრირებული ადამიანები მაშინ იყვნენ ოლიგარქები, მაგრამ დღეს ამაზე საუბარი აბსურდია.
ოლიგარქად დღეს შეიძლება მოვიხსენიოთ მხოლოდ ის ადამიანები, რომლებიც თანამშრომლოობენ კანონს მიღმა ხელისუფლებასთან, ასე იღებენ მატერიალურ სიკეთეს და შემდგომში მმართველი პარტიის სალაროსთან რიგში დგებიან – ამის უამრავი პრეცედენტი შეიძლება ვნახოთ. ფულის მოცულობა აქ მნიშვნელობა არა აქვს, აქ არის საუბარი ურთიერთობის მოდულზე, როდესაც ვსაუბრობთ დეოლიგარქიზაციაზე, უნდა მოვახდინოთ დისტანცირება ეკონომიკურ, ბიზნეს აქტივობასა და პოლიტიკურ აქტივობას შორის. ამ საკითხის პერსონიფიცირება, ივანიშვილია, თუ ხაზარაძე – ეს აბსურდია. ვინც ამ ძირითად პრინციპებს არღვევს – ის არის ოლიგარქი. ასეთები შეიძლება იყვნენ მხოლოდ ხელისუფლებაში.
არის თუ არა ივანიშვილი ოლიგარქი – ეს უნდა დადგინდეს შესაბამის კანონით. შეიძლება ბიძინა ივანიშვილი არ იყოს და ვიღაც სხვა აღმოჩნდეს, ვიღაც, რომელიც ხელისუფლებასთან დაკავშირებულია, უპირატესობას იღებს ტენდერებში, აუქციონებში, სახელმწიფო კონტრაქტებს იღებს არაკეთილსინდისიერად.
ყველა ხელისუფლებას ეყოლება ოლიგარქები, თუ ეს სისტემა არ დარეგულირდა.
კომენტარები