„ალიას“ ესაუბრება პარტია „გამარჯვებული საქართველოს“ თანადამფუძნებელი, ადვოკატი, ვალერი გელბახიანი.
– ბატონო ვალერი, ბაიდენის პრეზიდენტობა უკვე შემდგარი ფაქტია, მოიგო საპრეზიდენტო არჩევნები და უკვე თეთრ სახლშია. რა იქნება ბაიდენის ადმინისტრაციის პირველი ნაბიჯები საქართველოსთან დაკავშირებით?
– სამხრეთ კავკასიაში, სომხეთ–აზერბაიჯანის ომის შემდეგ, ვითარება ამერიკისთვის არასახარბიელოდ შეიცვალა. გაჩნდა საფრთხე, რომ ამერიკა რეგიონში გავლენას დაკარგავს. თუმცა, ჯო ბაიდენი ამას არ დაუშვებს, ტრამპისგან განსხვავებით, არ შეეგუება ამერიკის მსოფლიო ლიდერის სტატუსის დაკარგვას. უნდა ველოდით, ამერიკის გააქტიურებას სამხრეთ კავკასიაში. სავარაუდოდ, თურქეთთან ახალ პოლიტიკას შეიმუშავებს ბაიდენის ადმინისტრაცია. ტრამპის პრეზიდენტობისას, საქართველოს და უკრაინას დიდი ყურადღება არ ეთმობოდა და ესეც შეიცვლება. ამერიკა აქტიურად ჩაერევა ორივე ქვეყანაში იმ საკითხებში, რაც დემოკრატიის განვითარებას შეეხება.
– ჯერ კიდევ ტრამპის ადმინისტრაცია ითხოვდა საქართველოსგან ანაკლიის პორტის მშენებლობას, რომელიც, რეალურად, ამერიკის წყალქვეშა სამხედრო ბაზა უნდა ყოფილიყო საქართველოში. ბაიდენის ადმინისტრაცია, სავარაუდოდ, უფრო ხისტად და კატეგორიულად მოითხოვს იმავეს. ეს საკითხი ხომ არ გამოიწვევს რუსეთ–საქართველოს შორის სამხედრო დაპირისპირებას, რათა პროექტი ჩავარდეს? რუსეთი არ აპირებს შეეგუოს, ამერიკის სამხედრო ბაზას საქართველოში.
– ეს კითხვა, ფაქტობრივად, სენატში დაუსვეს ამერიკის სახელმწიფო მდივნობის კანდიდატს, ტონი ბლინკენს. ერთ–ერთმა სენატორმა ჰკითხა, რას აპირებდა ამერიკა საქართველოსთან მიმართებაში და დაეხმარებოდნენ თუ არა, საქართველოს ნატო–ში გაწევრიანებაში. ტონი ბლინკენმა განაცხადა, რომ ნატო–ს კარი ღიაა საქართველოსთვის და ჩვენ თუ დავაკმაყოფილებთ ნატო–ს მოთხოვნებს, სტანდარტებს, მაშინ ჩვენი ნატო–ში მიღება პრობლემა არ იქნება. ამას მოჰყვა მეორე კითხვა, ეს ხომ არ გამოიწვევს რუსეთსა და საქართველოს შორის ომს? ბლინკენმა უპასუხა, რომ ომამდე ეს საქმე არ მივა, ნატო–ს წევრ არც ერთ ქვეყანას არ ჰქონია პრეცენდენტი, რომ ნატო–ში შესვლის გამო, რუსეთთან ომში ჩაბმულიყო. მოკლედ, რუსეთ–საქართველოს კონფრონტაცია, არათუ ანაკლიის პორტის აშენების შემთხვევაში, ნატო–ში საქართველოს შესვლის შემთხვევაშიც გამორიცხა. სხვათაშორის, ამ სენატორმა ისიც განაცხადა, რუსეთ–საქართველოს შორის ომი თუ დაიწყო, ჩემს შვილს იმ ომში არ გავუშვებო და ამაში დაეთანხმა ტონი ბლინკენი. ეს ნიშნავს, რომ ამერიკას აქვს ურყევი პოზიცია, რომ საქართველო გახდეს ნატო–ს წევრი. ამერიკა შექმნის საქართველოს თავდაცვის სისტემას, ვიდრე ნატო–ში მიგვიღებენ, ეს აუცილებლად მოხდება. მერე, მეორე მომენტიც არის. რუსეთს ახლა ჩვენთან იმისთვის არ სცალია. რუსეთში ახლა ისეთი ბუნტია, საკითხავია, პუტინის ხელისუფლება გადაურჩება თუ არა ამ ბუნტს. მოსკოვში ნახევარმილიონიანი მიტინგი იყო, სანკტ–პეტერბურგშიც დიდი მიტინგი იყო და ყველა დიდ ქალაქში. ეს ნიშნავს, რომ მთელი ქვეყანა აჯანყდა. „ომონი“ და პოლიცია ამ აჯანყებულ ხალხს ვეღარ მოერევა. რუსეთის ხელისუფლება იძულებული გახდება, დათმობებზე წავიდეს და ეს დათმობები შიდა პოლიტიკაზე უნდა აისახოს. ან არადა, წავა სახლში პუტინის ხელისუფლება. ეს მთლიანად ცვლის იმ პოლიტიკას, რაც დღეს „დერჟავული“ თვალსაზრისით აქვს რუსეთს თავის მეზობლებთან.
ლევან ჯავახიშვილი, ალია
კომენტარები