(ვიდეო) – ბადრაგი თავში გამეტებით ურტყამს პატიმარს – დარღვევები ციხეში

იუსტიციის მინისტრი თავად ავრცელებს კადრებს, სადაც ჩანს, თუ როგორ ესხმიან თავს პატიმრები მის თანამშრომლებს.

სულ 5 ფაქტია – გაურკვეველია, მხოლოდ 5 შემთხვევა მოხდა დაპირისპირების, თუ დანარჩენი შემთხვევები იმდენად მძიმეა, არ უნდა ვნახოთ.

ამ ხუთი ფაქტიდან, პირველში – ნათლად ჩანს, რომ რაღაცას ითხოვს პატიმარი სამედიცინო პერსონალისგან, რას შეიძლება პატიმარი ექიმს სთხოვდეს – ამაზე პასუხი მინისტრს ექნება.

მეორე შემთხვევაში, თავდასხმა იმდენად მოულოდნელი იყო, დაცვაც კი არ ელოდა, თავდასხმა გამოიწვია რაღაც სიტყვებმა, დიდი ალბათობით, მაგრამ დაცვა რომ მდგარიყო ექიმსა და პატიმარს შორის, რომ არ ყოფილიყო წამომჯდარი ტუმბოზე – თავდასხმას აირიდებდა.

დანარჩენ სამ შემთხვევაშიც ჩანს რომ პატიმარს, პრეტენზია აქვს კონკრეტულ თანამშრომელთან და არა ყველასთან, თუმცა, მეორე პირი, რომლისკენაც პატიმარი არ იწევს, ისევ და ისევ არ დგას – პატიმარსა და იმ ბადრაგს შორის, რომელი ბადრაგის მიმართაც პრეტენზია აქვს.

ყველაზე სავალალო მეხუთე ფაქტია, სადაც ბადრაგს, რომლის წონაც მინიმუმ ორჯერ აღემატება პატიმრის წონა, ხვდება პატიმრის ხელი ყურთან და პასუხად, მუშტებს ურტყამს თავში პატიმარს, რომელსაც რამდენმე ბადრაგი აკავებს.

ამ მეხუთე შემთხვევის აცილებაც შესაძლებელი იყო, რადგან, აქაც პატიმარს, როგორც ჩანს, ამ კონკრეტულ ბადრაგთან აქვს კონფლიქტი.

ბადრაგის თანამშრომლებიდან, ზოგს აცვია ფორმა, ზოგს – არა, ზოგი – ჯინსითაა, ზოგი ფორმით და გარკვეველია, ვინ იღებს პატიმრის შეჩერებაში მონაწილეობას.

ვიდეოდან ისიც თვალნათლით ჩანს, რომ პატიმრებს ყველა ბადრაგის მიმართ არა აქვთ პრეტენზია, განსაკუთრებით კარგად ეს პირველ ვიდეოში ჩანს – სადაც, პატიმარს პრეტენზია მხოლოდ სამედიცინო პერსონალთან და მათ ნივთებთან აქვს და ბადრაგს უსმენს ბოლოს კიდეც.

რას გვეუბნება ამ ვიდეოს გავრცელებით მინისტრი?

გვეუბნება, რომ ციხეში პრობლემებია.

გვეუბნება, რომ ბადრაგი არ იცავს ელემენტარულ წესებს, თუნდაც დგომის წესს (ჩაცმაზე რომ არ გამოვეკიდოთ) – ექიმსა და პატიმარს შორის.

ქალბატონმა მინისტრმა რომ იცოდეს, ციხე გამოიგონა კაცობრიობამ იმისთვის, რომ დამნაშავე, მოძალადე გამოვაცალკეოთ საზოგადოებისგან, თორემ, ძალადობის აღმოფხვრა რომ ძალადობითვე შეიძლებოდეს – ციხეში რატომ დავარტყათ? – გარეთ ვცემთ და გამოსწორდება.

ალია