,,უნდა ეფერო რუსეთს, აგინო დასავლეთს და იზრუნო ბიძინაზე – ,,ოცნების” პოლიტიკური ფორმულა” – გია ხუხაშვილი

ლევან  ჯავახიშვილი

„ალიას“ ესაუბრება ექსპერტი, გია ხუხაშვილი.

-რა კომიკური სიტუაციაა ქვეყანაში, ნახეთ –  ხალხი რუსეთთან უვიზო რეჟიმის გაუქმებას მოითხოვს. დავუშვათ, ამის მომხრებმა აქცია მოაწყეს. თუ ხელისუფლებაა დასჭირდა, კონტრაქციას ქართველი რუსეთუმეები კი აღარ გამართავენ, შეიძლება თავად ჩამოსული რუსები შეიკრიბონ და იმათ გამართონ აქცია, რომ მათი უფლებები იზღუდება და ირღვევა. არ გრჩებათ ასეთი შთაბეჭდილება?

– ეგ მარათლა არ არის გამორიცხული. ეს არის რუსების თვისება. რუსები სადაც მასობრივად ჩადიან, იქ უკვე ბატონ-პატრონებად გრძნობენ თავს, სტუმრებად კი არა. ისინი უფროსები არიან, ასე არიან შეჩვეულები. საქართველო მათვის ისევ „გრუზიაა“,  მათი გაგებით, რუსეთის იმპერიის ნაწილია. ჩამოსულები არიან, როგორც ბატონები. ძალიან უკმაყოფილონი არიან, რომ ქართველთა ახალმა თაობამ რუსული არ იცის და ვერ ემსახურებიან ან ისე ვერ ემსახურებიან, როგორც სურთ, როგორც, დავუშვათ, ბელარუსში ემსახურებიან. ამაზე ძალიან ბრაზდებიან. მთელი კამპანია მოუწყეს დედა-ენის ბაღში მდებარე ბარს, სადაც სამართლიანი შეზღუდვები დახვდათ და ამის გამო, ბარში არ შეუშვეს. რუსები სოც-ქსელში ბარის დაწვითა და ათასი უბედურებით ემუქრებოდნენ ბარის მეპატრონეებსა და თანამშრომლებს. ეს თავხედობაა და კობახიძის განცხადების ფონზე, კიდევ უფრო გათავხედებიან. თუ ვინმე პროვოკაციას აწყობს და ქსენოფობიას და რაღაც ინციდენტებს ახალისებს, ეს მხოლოდ ხელისუფლებაა. ამას არ აკეთებენ არც კრიტიკული მედია, არც არასამთავრობოები, არც ოპოზიციური პარტიები, რისი დაჯერებაც  ხელისუფლებას უნდა ხალხისთვის. ხელისუფლება ატარებს პოლიტიკას, რომელსაც უცილობლად კონფლიქტამდე მივყავართ.

-რამდენად რეალურია ეს კონფლიქტი და სადამდე არიან წამსვლელები რუსეთისა და ჩვენი ხელისუფლება?

-ნებისმიერი ექსპანსია იწყება „რბილი ძალის“ გამოყენებით. ეკონომიკური, კულტურული, პოლიტიკური ექსპანსია და თუ ეს ყველაფერი არ  არის საკმარისი, ამით მიზანს ვერ აღწევს და ქვეყანას ვერ იპყრობს, მერე იწყებს იმპერია სამხედრო  ძალის გამოყენებას. რუსეთს საქართველოში სამხედრო ძალის გამოყენება არც სჭირდება. თეორიულად წარმოვიდგინოთ, ტანკები რომ შემოიყვნონ  თბილისში, „ქართულ ოცნებაზე“  უკეთესი ვინ უნდა მოიყვანონ ხელისუფლებაში? ყურმოჭრილი მონები ჰყავს ბიძინა ივანიშვილი და მისი პოლიტიკური გუნდის სახით და არა მგონია, უკეთესები იშოვნოს. მეტიც, რუსეთი მისთვის უკეთესს და უფრო ერთგულებს ვერც კი ინატრებს. ნახეთ, ამათი  მთელი ამ საქმიანობის ფორმულა რა არის – უნდა ეფერო რუსეთს, აგინო დასავლეთს და იზრუნო ბიძინაზე. კერძოდ, მის ფულზე, ქონებასა და უსაფრთხოებაზე. ეს არის ამათი მართვის მთელი ფილოსოფია, მეტი არც არაფერი ხდება. დასავლეთს აგინებენ და რუსეთს ხომ თავად ეფერებიან, ჩვენც გვეუბნებიან, თქვენც  მოეფერეთ რუსებს, მათით უკმაყოფილონი არ იყოთ, თორემ ყველას დაგიჭერთო. დასავლეთი კი მამაძაღლია, იმიტომ რომ ბიძინას პრობლემებს უქმნისო. ეს არის ყველაფერი, რასაც აკეთებენ თვეებისა და მეტიც, წლების განმავლობაში.