უახლოეს რამდენიმე კვირაში მსოფლიო ბაზარზე კორონავირუსის საწინააღმდეგო ულტრაიისფერი მრავალჯერადი ნიღბები გამოჩნდება. იდეა ველნეს კურორტ „ბიოლის“ დამფუძნებელ თამაზ მჭედლიძესა და მის პარტნიორებს ეკუთვნით. ნიღბების წარმოება უკვე დაწყებულია უკრაინაში და ქართველი მომხმარებელი მათ შეძენას სააფთიაქო ქსელებში თვის ბოლოს შეძლებს. როგორ ებრძვის ულტრაიისფერი ნიღაბი კორონავირუსს, ამის შესახებ, „კომერსანტს“ თამაზ მჭედლიძე ესაუბრა.
იმ ფაქტიდან გამომდინარე,რომ კორონავირუსი ვერ იტანს ულტრაიისფერ გამოსხივებას, დაგვებადა იდეა, გვეწარმოებინა ულტრაიისფერი ნიღბები. მოვიძიეთ და აღმოვაჩინეთ,რომ მსოფლიოში ანალოგი არ არსებობს, ამასთანავე, სპეციალისტებთან კონსულტაციები გავიარეთ და გავარკვიეთ ზუსტად, რა პარამეტრები და გამოსხივება გვჭირდება სასურველი შედეგის მისაღებად.
ნიღაბს საჰაერო ლაბირინთი აქვს,სადაც ულტრაიისფერი სხივებია, თუ ადამიანი კორონავირუსს შეისუნთქავს,ნათება მის სტრუქტურას დაარღვევს და ვირუსი უარყოფითად ვეღარ იმოქმედებს ორგანიზმზე. ნიღაბი მრავალჯერადია და მისი მუშაობის დროთ 10 000 საათია განსაზღვრული.
საქართველოში წარმოების პროცესი ჭიანურდებოდა, ამიტომ უკრაინაში შემოგვთავაზეს ნიღებების წარმოება, ერთ-ერთმა ქარხანამ ლაბორატორია გამოგვიყო.წარმოებისთვის მნიშვნელოვანია დიოდები,რომლებსაც მხოლოდ ოთხი ქვეყანა უშვებს. ამ დროისთვის შევისყიდეთ 5 000-მდე დიოდი, თითო ნიღაბს კი სჭირდება ორი სჭირდება. შესაბამისად, პირველი ეტაპისთვის 2500 ნიღაბს გამოვუშვებთ,- ამბობს თამაზ მჭედლიძე.
მისი გათვლებით, თვეში 30 000-მდე ულტრაიისფერი ნიღბის წარმოება იგეგმება. ერთი ნიღაბის თვითღირებულება ამ ეტაპზე 50 დოლარს შეადგენს, თუმცა ტრანსპორტირება და ქსელში გადატანა ნიღაბის ფასს გაზრდის. მჭედლიძის განმარტებით, მას შემდეგ, რაც ნიღბების სერიული წარმოება დაიწყება, პროდუქციის თვითღირებულება შემცირდება.
პირველი პარტია ძვირი იქნება, თუმცა, შემდეგ გაიაფდება. წარმადობა დამოკიდებული იქნება დიოდების რაოდენობაზე.ამ ეტაპზე თვითღირებულება 50 დოლარია, ტრანსპორტირება და ქსელში გატანა,რა თქმა უნდა, ფასს ასწევს. საბოლოო ღირებულებას, ანუ გასაყიდ ფასს უკვე ის სააფთიაქო ქსელები დაადგენენ,სადაც პროდუქტი გაიყიდება.
რაც შეეხება, პროდუქციის საქართველოში წარმოებას, უკვე დავიწყეთ ამ საკითხზე მუშაობა, ვართ დაზგებისა და სხვა მასალების მოძიების პროცესში,– აღნიშნავს თამაზ მჭედლიძე.
მისივე განმარტებით, პროექტში დაახლოებით 100 ათასობით დოლარის ინვესტიცია განხორციელდა. ოფიციალურ მწარმოებლად კი ქართული მხარის დაკვეთით, უკრაინული ქარხანა ითვლება.
კომენტარები