“უკრაინასთან ასეთი ვალდებულება დასავლეთს არ გააჩნია, ამის მიუხედავად მას იარაღს აწვდიან და რუსეთს სანქციებს ადებენ” – თორნიკე შარაშენიძე

პოლიტოლოგი, თორნიკე შარაშენიძე:

“ბოლო დროს გახშირდა უკრაინის თემასთან დაკავშირებით 1938 წლის “მიუნხენის კაპიტულაციის” გახსენება.

1938 წლის მიუნხენური გარიგება მართლაც სამარცხვინო ამბავი იყო, თუმცა უკრაინის ვითარებასთან (მადლობა ღმერთს) არც ისე ბევრი აქვს საერთო.

როგორც ვიცით, 1938 ჩეხოსლოვაკიის ტერიტორიის ნაწილი მესამე რაიხს გადაულოცეს. მალე კი ჩეხოსლოვაკიამ არსებობა საერთოდ შეწყვეტა.

მიუნხენის გარიგება სამარცხვინო უპირველესად იმიტომ გახლდათ რომ ჩეხოსლოვაკიას საფრანგეთთან ალიანსი ჰქონდა და შესაბამისად მისი დაცვის ვალდებულება არსებობდა. ფრანგებმა ინგლისელების ჩაგონებით ალიანსი ერთ ადგილას დაიკიდეს. ასე მიართვეს ჰიტლერს ხონჩით აღმოსავლეთ ევროპის უმდიდრესი ქვეყანა რომელიც ამის გარდა რეგიონში ერთადერთი დემოკრატია გახლდათ.

უკრაინასთან, როგორც ცნობილია, ასეთი ვალდებულება დასავლეთს არ გააჩნია. ამის მიუხედავად მას იარაღს აწვდიან და რუსეთს სანქციებს ადებენ.

ხოლო ინგლისმა მას შემდეგ რაც ჩეხოსლოვაკიისნაირი ქვეყანა ჰიტლერს ჩააბარა პოლონეთს მისცა დაცვის გარანტიები (და საფრანგეთსაც იგივე ჩააგონა). პოლონეთი ჩეხოსლოვაკიისგან განსხვავებით არც დემოკრატია იყო და მისი დაცვაც გაცილებით რთული იქნებოდა ვიდრე ჩეხოსლოვაკიის. გარდა ამისა, ჩეხოსლოვაკიისგან განსხვავებით პოლონეთი იქამდე ჰიტლერთან მშვენივრად თანამშრომლობდა…”