„უკან დამხევი აღარ ვარ, ერს არ გაგარყვნევინებთ!” – მამა შალვა ვიდეომიმართვას აქვეყნებს

„მე უკან დამხევი აღარა ვარ, მე ერს არ გაგარყვნევინებთ, მე ერს არ გაგანადგურებინებთ, მე ამ ქვეყანაში შვილები მეზრდება, მე ამ ქვეყნიდან წასვლას არ ვაპირებ. მე მინდა, რომ ჩემი შვილები ამ ქვეყანაში გავზარდო, სადაც ღირებულებების და ფასეულობების ქვეყანაა.”, – ამის შესახებ მამა შალვა კეკელიამ სოციალურ ქსელში გამოქვეყნებულ ვიდეომიმართვაში ისაუბრა.

დეკანოზის თქმით, ის, როგორც სასულიერო პირი, ძალადობას ემიჯნება, თუმცა ლგბტქ თემის წარმომადგენლებს საზოგადოებამ რუსთაველზე მარშის გამართვისა და „ქადაგების” უფლება არ უნდა მისცეს.

„ჩვენ არ ვართ ძალადობის მომხრე, როგორ შეიძლება მღვდელი ძალადობის მომხრე იყოს. მაგრამ არავის არ მივცემთ ქადაგების უფლებას ჩვენს ქვეყანაში. მათ თავისუფლად შეუძლიათ, პირველიდან ხუთამდე აქვთ დაანონსებული პრაიდი, ღამე ჩუმად გაიარონ, მაგრამ ისინი გვეუბნებიან, რომ ჩვენ გავივლით და ვერაფერს ვერ გვეტყვით ჩვენ. რადგან ასე გვეუბნებიან და ომი გამოგვიცხადეს, ჩვენ ვეტყვით თქვენ ვერ გაივლით, ვერასოდეს ვერ იქადაგებთ ამას. თქვენ დადიხართ ყოველდღე რუსთაველზე და სიარულს არავინ არ გიშლით. ყოველდღე დადიან ასეთი ადამიანები და არასდროს აგრესია არ გამოგვიხატავს მათ მიმართ.”, – ამბობს მამა შალვა კეკელია.