“ცრუ დასმენა” – გახარია კობახიძის წინააღმდეგ

ყოფილმა პრემიერმა გიორგი გახარიამ მის მიმართ ირაკლი კობახიძის ბრალდებებზე გამოძიების დაწყებისთვის პროკურატურას მიმართა. საქმე ეხება მის განცხადებებს “კოკაინის მოხმარებაზე”.

მიხეილ დაუშვილი:

“გენერალურ პროკურატურას მივმართეთ, რათა ჩაატაროს ობიექტური, გამჭვირვალე, სრულყოფილი და ეფექტიანი გამოძიება და გამოიძიოს ის აბსოლუტურად უპასუხისმგებლო, უსაფუძვლო განცხადებები, რასაც ჩვენ ორგანიზაცია ოცნების ხელმძღვანელისგან, ირაკლი კობახიძისგან გიორგი გახარიასთან დაკავშირებით ვისმენთ.

ბოლო პერიოდის განმავლობაში მუდმივად გვაბრალებენ ნარკოტიკის მოხმარებას, შეძენას და ა.შ. ცალსახად, ამ ყველა კითხვას პასუხი უნდა გაეცეს და სრულყოფილი, ობიექტური და გამჭვირვალე გამოძიების შემდეგ, როცა დადგინდება, რომ ეს ბრალდებები უსაფუძვლოა, რა თქმა უნდა, უნდა დადგეს ირაკლი კობახიძის პასუხისმგებლობის საკითხიც ცრუ დასმენასთან დაკავშირებით. რასაც ეს ადამიანები გვაბრალებენ დანაშაულია. ამას სჭირდება გამოძიება”