ტრამპმა მხარდამჭერებისთვის ახალი საიტი შექმნა

აშშ-ს ყოფილმა პრეზიდენტმა, დონალდ ტრამპმა მხარდამჭერებთან ურთიერთობისთვის ახალი საიტი, donaldjtrump.com-ი შექმნა. საიტზე არის განყოფილება, From the Desk of Donald J. Trump (დონალდ ჯ. ტრამპის საწერი მაგიდიდან), სადაც ტრამპი სტატუსებს წერს. აქ უკვე გამოქვეყნებულია რამდენიმე გზავნილი. პირველი 13 აპრილით თარიღდება, თუმცა საიტი ფართო აუდიტორიისთვის ხელმისაწვდომი მხოლოდ 4 მაისს გახდა.

მომხმარებლებს შეუძლიათ, ტრამპის პოსტები Twitter-ზე და Facebook-ზე გააზიარონ, თუმცა არ შეუძლიათ, თავად დატოვონ კომენტარები.

დონალდ ტრამპის მრჩევლის, ჯეისონ მილერის თანახმად, ეს საიტი არ არის სოციალური მედიის პლატფორმა, რომელზეც მილერი მარტში საუბრობდა. მარტში ტრამპის მრჩეველი ამბობდა, რომ დონალდ ტრამპი სოციალური მედიის საკუთარი პლატფორმის შექმნას გეგმავს და ეს პროექტი “მთლიანად შეცვლის თამაშის წესებს”.