„ამ ეტაპზე, ქვეყანაში პროდუქციის შესაბამისი მარაგები არსებობს. დღეს დაცარიელებული მაღაზიების თაროები რამდენიმე დღეში ისევ გადაივსება, არანაირი საფუძველი არ არსებობს პანიკური შესყიდვებისთვის“, – განაცხადა „იმედინიუსთან“ საუბრისას მაღაზიათა ქსელ „მაგნიტის“ აღმასრულებელმა დირექტორმა ია ნადირაშვილმა.
„მიმდინარე მოვლენები მსოფლიო ეკონომიკაზე ახდენს გავლენას, თუმცა, რაც შეეხება პროდუქტების მარაგს, ძალიან კოორდინირებული მუშაობა გვაქვს დისტრიბუტორებთან, სახელმწიფო სტრუქტურებთან, სოფლის მეურნეობის სამინისტროსთან, ინტენსიურ რეჟიმში ვცვლით ინფორმაციებს. დღეს იყო პროდუქციის პანიკური შესყიდვები, რაც საფუძველსაა მოკლებული. ქართულ ბაზარზე საკმარისი მარაგია და პანიკის არანაირი საფუძველი არ არსებობს. გარდა ამისა, ტონობით პროდუქციაა გზაშია, უნდა გადმოიკვეთოს სახელმწიფო საზღვარი, რაშიც ჩართულია სახელმწიფოც და ლოგისტიკურ თემებს დააჩქარებენ. ადგილზეცაა საკმარისი მარაგები. დღეს დახლებზე პროდუქციის შემცირება მომხმარებლის მხრიდან პანიკური შესყიდვით იყო გამოწვეული. კიდევ ერთხელ ვამბობ, ამის საფუძველი არ არის. რაც შეეხება ფასებს – ცალსახად, ფასების ზრდა გარდაუვალია. ეს რამდენიმე ასპექტითაა განპირობებული. პირველ რიგში, ეს არის დოლარის კურსის ცვალებადობა. გრძელვადიან პერიოდში ეს იმოქმედებს იმ თვალსაზრისით, რომ თუ უკრაინის ან რუსეთის ბაზარი სხვა ქვეყნებით ჩანაცვლდება, ლოგისტიკა უფრო ძვირი დაჯდება და გაიზრდება პროდუქციის თვითღირებულებაც. რომ შევაჯამოთ, ფასების ზრდა გარდაუვალია, თუმცა, ამ ეტაპზე, ქვეყანაში არსებობს შესაბამისი მარაგები. დღეს დაცარიელებული მაღაზიების თაროები რამდენიმე დღეში ისევ გადაივსება, არანაირი საფუძველი არ არსებობს პანიკური შესყიდვებისთვის“, – განაცხადა ია ნადირაშვილმა.
კომენტარები