თუ გაინტერესებთ, რატომ ვართ ღარიბები, რატომ მივდივართ უკან, ეს ბიძიები არიან ყველა პრობლემის სათავეში – გიორგი ლუბარეცი

Localinsights-ის თანადამფუძნებელი, პროგრამული ინჟინერი, გიორგი ლუბარეცი, სოციალურ ქსელში, წერს:

“ამბავი იმისა, თუ როგორ ზარალდება მომხმარებელი, როცა მარეგულირებელი არაკომპეტენტური მიკრომენეჯერის როლს ირგებს.

დაახლოებით 1 კვირის წინ, ეროვნულმა ბანკმა ახალი რეგულაცია დაუწესა ბანკებს, რომლითაც განსაზღვრა, თუ როგორ უნდა მუშაობდეს აუთენტიფიკაცია და ავტორიზაცია ნებისმიერ ინტერნეტ ბანკში ან ინტერნეტ ბანკთან მიახლოებულ ელექტრონულ სისტემაში.

შედეგად მივიღეთ ძალიან კომიკური შემთხვევები, სადაც მაგალითად მომხმარებელს, რომელიც თითის ანაბეჭდით შედის თავის მობილურ მოწყობილობაში, შემდეგ თითის ანაბეჭდით ხსნის ინტერნეტ ბანკის აპლიკაციას, დამატებით კიდე SMS-ით გამოგზავნილი კოდის შეყვანა სჭირდება და ამ ყველაფერის შემდეგ, თუ მან ტრანზაქციის შესრულებაც მოინდომა, ისევ SMS-ით გამოგზავნილი კოდი უნდა შეიყვანოს. იმის მიუხედავად, რომ მან უკვე ძალიან მაღალი დონის აუთენტიფიკაცია გაიარა.

პირველ რიგში, რაც უნდა იცოდეთ ნებისმიერ პროგრამულ უზრუნველყოფაზე, იქნება ეს მობილური აპლიკაცია თუ რაღაც საიტი, არის ის, რომ პროგრამული ინჟინრები ძალიან ცუდად ვაკეთებთ ჩვენს საქმეს. კომპეტენციის პრობლემა არაა, უბრალოდ ყველა ციფრული სისტემა ძალიან ფაქიზია, არის უამრავი პატარა მიკროსისტემისგან შემდგარი, ერთმანეთთან უამრავი “სკოჩით” დაწებებული, რომელშიც არის კომპონენტები, რომლებსაც წლებია არავინ კიდებს ხელს იმის გამო, რომ მუშაობს. ოღონდ არავინ იცის, რატომ მუშაობს და ყველა ინჟინერს ეშინია, რომ ხელი მოკიდოს, კასკადური ეფექტის თავიდან ასაცილებლად. ყველა ციფრულ სისტემაში არის ასეთი კომპონენტები, როგორი კვალიფიციური კადრებიც არ უნდა ჰყავდეს პროდუქტის მფლობელს.

და ეროვნული ბანკი, რომელმაც არაფერი იცის იმაზე, თუ როგორ მუშაობენ ელექტრონული სისტემები, ამ სისტემებში ჩარევა და “მე უკეთ ვიცი, როგორ უნდა” მიდგომით, ბანკებს თითქმის ყველა კრიტიკულ კომპონენტში ძალიან რადიკალური ცვლილებების შეტანა აიძულა.

შედეგად მივიღეთ ზემოთ აღწერილი კომიკური შემთხვევები და დამატებით, უკვე ერთი კვირაა, რაც ბანკებს თითქმის ყველა კომპონენტში რაღაც “უსხავს”, ხან მესიჯები არ მოდის, ხან საერთოდ ინტერნეტ ბანკი ითიშება, ხან თანხის გამოტანაა შეუძლებელი, ხან რა და ხან რა. ზუსტად ესაა ის კასკადური ეფექტი, რასაც ნებისმიერ ციფრულ პროდუქტზე მომუშავე გუნდი მაქსიმალურად ერიდება და თუ აუცილებელი ხდება ფაქიზი კომპონენტების ცვლილება, ამას ძალიან მკაცრად გაწერილი ნაბიჯებით, ნელ-ნელა ცვლიან, კასკადური ეფექტის თავიდან ასაცილებლად.

მოკლედ, ეროვნულმა ბანკმა უთხრა ბანკებს, რომლებმაც ყველაზე კარგად იციან, თუ როგორ უნდა უზრუნველყონ თავისი სისტემების გამართულად მუშაობა, რომ არა, მან უკეთ იცის. რასაც ძალიან ცუდი შედეგები მოჰყვა. ოღონდ ბანკებისგან განსხვავებით, ეროვნული ბანკი პასუხისმგებელი არავისთანაა, არავინ აკონტროლებს, არც კრიტიკას იღებს. ნავთი გადაასხა ბანკების სისტემებს, ზიპო მიუგდო, გაბრუნდა და კმაყოფილი სახით აგრძელებს მოღვაწეობას. და ამ დროს ბანკები ცეცხლწაკიდებული სისტემების აღდგენას ცდილობენ, მომხმარებლების კრიტიკის ფონზე.

თუ გაინტერესებთ, რატომ ვართ ღარიბები, რატომ მივდივართ უკან, რატომ არ უნდა არავის ამ ქვეყანაში ინოვაციური პროდუქტების შექმნა და რატომ გარბიან ინოვატორები, შორს გახედვა არ გჭირდებათ, “შენზე უფრო ჭკვიანი”, თბილ სავარძელზე მომჯდარი მარეგულირებელი ბიძიები არიან ყველა პრობლემის სათავეში.”