სომხეთში კორონავირუსის პირველი შემთხვევა დადასტურდა. ამის შესახებ Facebook-ზე ქვეყნის პრემიერ-მინისტრი, ნიკოლ ფაშინიანი წერს.
მისი განცხადებით, ინფიცირებული სომხეთის 29 წლის მოქალაქეა, რომელიც ცოლთან ერთად 28 თებერვალს ერევანში თეირანიდან ჩაფრინდა.
ფაშინიანის თქმით, ირანიდან დაბრუნებულმა ახალგაზრდა კაცმა საავადმყოფოს თვითონ მიმართა და ახლა მისი მდგომარეობა დამაკმაყოფილებელია. კლინიკაში მისვლისას მას ტემპერატურა ჰქონდა, თუმცა ახლა აღარ აქვს.
რაც შეეხება ინფიცირებულის ცოლს, მას კორონავირუსი არ დაუდგინდა. სომხეთის მთავრობა ჯანდაცვის მსოფლიო ორგანიზაციის მიერ გავრცელებული რეკომენდაციებით ხელმძღვანელობს. ყველას, ვისაც კორონავირუსით ინფიცირებულთან ჰქონდა კონტაქტი, ექიმები დააკვირდებიან.
ბოლო მონაცემებით, ჩინეთში გარდაცვლილთა რაოდენობამ 2 870-ს მიაღწია, ინფიცირებულთა რიცხვი კი 79 824-ს შეადგენს. მსოფლიო მასშტაბით, ვირუსი უკვე 50-ზე მეტ ქვეყანაშია გავრცელებული, სადაც გარდაცვლილთა რაოდენობამ 100-ს გადააჭარბა.
კომენტარები