ნიკა ლალიაშვილი ტელეკომპანია იმედის დირექტორად დაინიშნა. როგორც რადიო თავისუფლება იუწყება, ლალიაშვილის დირექტორის დანიშვნის შესახებ გადაწყვეტილება არხის სამეთვალყურეო საბჭოს წევრებმა 31 ივლისს მიიღეს. საჯარო რეესტრში შესაბამისი ცვლილება 6 აგვისტოთი თარიღდება.
ლალიაშვილის ამ თანამდებობაზე დანიშვნამდე არხის დირექტორი ელდარ მდინარაძე იყო. მდინარაძე “იმედში” გასული წლის ივლისში დაინიშნა. ის წლების წინ, “ვარდების რევოლუციამდე” ბიძინა ივანიშვილის ტელევიზიაში, მე-9 არხში მუშაობდა. შემდეგ კი ვანო ჩხარტიშვილის ტელეკომპანიაში, “მზეში” დირექტორის თანამდებობა ეკავა.
“იმედში” მუშაობის დროს მის სახელს უკავშირდება აგვისტოს ომის შესახებ მომზადებული ფილმი, რომელსაც “ჩვენ მშვიდობით მოვიგებთ სხვის დაწყებულ ომს” ერქვა. არხის თანამშრომლები ფილმს ეთერში გასვლის შემდეგ გაემიჯნენ და აცხადებდნენ, რომ მიუღებელი იყო რუსეთის ჯარის საქართველოში იძულებით შემოჭრის შესახებ გამოთქმული ვერსია.
36-წუთიანი ფილმი გასული წლის 12 აგვისტოს გამოქვეყნდა და მასში რუსული პროპაგანდის კლასიკურ გზავნილებს მოიცავს, რომლის მიხედვითაც, 2008 წლის აგვისტოს ომი ქართულმა მხარემ დაიწყო. რუსეთის პრეზიდენტი, ვლადიმირ პუტინი კი, უბრალოდ, იძულებული გახდა, ომში მონაწილეობა მიიღო.
ფილმი ოპოზიციის წარმომადგენლებისა და მედია ექსპერტების გარდა, არხზე მომუშავე ჟურნალისტებმაც გააკრიტიკეს და Facebook-ზე ერთნაირი პოსტებით გაემიჯნენ მის შინაარსს, რის შემდეგაც ფილმი Facebook-გვერდიდან წაიშალა.
უავტორო ფილმზე მაშინ პასუხისმგებლობა სწორედ ნიკა ლალიაშვილმა აიღო და თქვა, რომ ფილმის პროდიუსერი თავად იყო.
კომენტარები