დაავადებათა კონტროლის ეროვნული ცენტრის ხელმძღვანელი, ამირან გამყრელიძე ამბობს, რომ პირბადის ტარების მოხსნა გარე სივრცეებში იმ შემთხვევაში იქნება შესაძლებელი, თუ მოსახლოების 20% მაინც იქნება აცრილი.
ამის შესახებ გამყრელიძემ საკოორდინაციო სხდომის დასრულების შემდეგ განაცხადა.
„დღევანდელი მონაცემებით, სულ 17 ათასი ადამიანი გვყავს ორჯერადად აცრილი, ვფიქრობ, სადღაც ივნისის შუა რიცხვებში 60-70 ათასი ორჯერადად აცრილი ადამიანი გვეყოლება და ეს საკითხი უფრო აქტუალურად დადგება.
შრომის ინსპექცია ასევე მუშაობს ე.წ. მწვანე კორიდორებზე, რესტორნებში მწვანე სივრცეებზე, სადაც ორჯერადად აცრილ ადამიანს თავისუფლად ყოფნა შეეძლება“, – განაცხადა ამირან გამყრელიძემ.
ფაქტია, 60 ათასი, მინიმუმ ათჯერ ნაკლებია მოსახლეობის 20 პროცენტზე, როდისთვის გეგმავს ქვეყანა მოსახლეობის 20 პროცენტის აცრას – ამ ეტაპზე ამის თქმა რთულია. ფაქტია ისიც, რომ დედაქალაქში მეტია აცრის მსურველი, თუმცა, მათ უთხრეს, რომ აცრის კაბინეტებს არ დაამატებდნენ და შეუძლიათ წავიდნენ, რეგიონებში ჩავიდნენ და იქ აიცრან. თითქმის სრულად უნდა აცრილიყო მედ. პერსონალი, რაც არ მოხდა, პარალელურად, ჟურნალისტებმა ითხოვეს, მათი როგორც რისკ-ფაქტორის ჯგუფში შემავალი ადამიანების აცრა – თუმცა, პასუხი უარყოფითი იყო. ხელისუფლებას მოსახლეობის სრულად ასაცრელად ვაქცინა ჯერ კიდევ არ შემოუტანია ქვეყანაში და ვისი აცრაც შეუძლია, იმათაც ჯიბრში უდგას, რაც ამ მოცემულობაში, მინიმუმ გაუგებარია.
კომენტარები