ინფექციური პათოლოგიის და შიდსის ცენტრის გენერალური დირექტორი თენგიზ ცერცვაძე “დღის კურიერის” ეთერში აცხადებს:
“სერიოზული ეპიდემიისა და პანდემიის დამარცხება შეუძლებელია ეფექტიანი ვაქცინაციის გარეშე. მართალია მარტო ვაქცინაციაც არ არის საკმარისი, უნდა იყოს ეფექტური მედიკამენტიც, რომელიც უკვე დაავადებულებს განკურნავს, მაგრამ მაინც ვაქცინაცია არის მთავარი, ამაზე უნდა შევთანხმდეთ.
თუ ჩვენ გვინდა, რომ ჩქარა დავუბრუნდეთ ნორმალურ ცხოვრებას, ჩქარა გაიხსნას ბიზნესი, ეკონომიკა, მიმოსვლა, რესტორნები, ზამთრის კურორტები, ფრენები, ყველაფერი, ამის გზა პირდაპირ გადის ვაქცინაციაზე, აი ამას უკვე სრული პასუხისმგებლობით მოგახსენებთ.
იქნება ეფექტიანი ვაქცინაცია და საკმარისი რაოდენობა მოსახლეობის იქნება აცრილი? ჩვენ აღარ დაგვჭირდება არც საპროტესტო გამოსვლები, არც რაღაც მოთხოვნები, არც რაღაც დავებში შესვლა შესაბამის ინსტიტუციებთან და სახელმწიფო სტრუქტურებთან, ეს ყველაფერი უმტკივნეულოდ და თავისით მოგვარდება. საჭიროა ამისთვის მხოლოდ აიცრას ქვეყნის მოსახლეობის 60%-65%-მა.
სავსებით სწორია, რომ დაახლოებით 15% უკვე კოვიდგადატანილია და მათ უკვე აქვთ იმუნიტეტი. ეს ტოლფასია დაახლოებით ვაქცინაციის და დაემატება ეს 15% იმ 65%-ს და 80% მოსახლეობის იქნება იმუნური ფენა. ისევ ეპიდემიოლოგიური გათვლები და სპეციალისტების მიერ დადებული რეკომენდაციები უჩვენებს, რომ თუ ქვეყნის მოსახლეობის 80% იმუნურია, იქ ეპიდემია და ინფექცია მოსახლეობას საფრთხეს ვერ უქმნის და არ არის საჭიროება არანაირი შეზღუდვების იმიტომ, რომ მართალია იმ 20%-ში ვიღაც გახდება ავად, მაგრამ ეს იქნება ძალიან მცირე რაოდენობა და ამას კლინიკური სექტორი ისე გაუმკლავდება, რომ მოსახლეობა პრაქტიკულად ვერ იგრძნობს დისკომფორტს.
საქართველოში იმ ვაქცინების შემოტანაზეა საუბარი, რომლებიც თავისი რეიტინგით ევროპაში ლიდერობენ და ესენია Pfizer -ი, Moderna და AstraZeneca. თუმცა, ჩინური ვაქცინაც საკმაოდ ეფექტურია.
ეს ჩემი პირადი აზრია და ვნახავთ, პრაქტიკა დაადასტურებს, რომ ჩინური ვაქცინა ეფექტურობით არ გამოდგება ცუდი და ხელწამოსაკრავი, მაგრამ ვინაიდან ჩვენთან სიტყვა ჩინური არ ასოცირდება მაღალ სანდოობასთან და რომ არ გავაღრმავოთ და არ მივცეთ მოსახლეობის სკეპტიკურ ნაწილს საბაბი, რომ უარი თქვან ვაქცინაზე, იმიტომ რომ ჩინურია, ამიტომ ჩვენმა მთავრობამ გადაწყვიტა და არაერთგზის განაცხადა, რომ შემოიტანს მხოლოდ იმ ვაქცინებს, რომლებიც სერტიფიცირებული იქნება ჯანმოს მიერ.
ჯერჯერობით ჩინური ვაქცინა არაა სერტიფიცირებული ჯანმოს მიერ და მას ვერ შემოიტანენ, თუმცა ამას ხელი არ შეუშლია ჩინური ვაქცინისთვის, რომ ის ეყიდა თურქეთს, აზერბაიჯანს, ბრაზილიას, არაბთა გაერთიანებულ ემირატებს. ერდოღანმა, მსოფლიოს ერთ-ერთმა ძლიერმა და შეძლებულმა ფიგურამ ღია ეთერში აიცრა ჩინური ვაქცინით”
კომენტარები